श्रीरामपूर-
मुठेवाडगाव येथील प्रसिद्ध समाजसेवक व रक्तमित्र अभयकुमार विजय तेलतुंबडे यांना उत्तर प्रदेशातील सोनभद्र जिल्ह्यातील दुधीनगर येथे दि. 15 मार्च रोजी आयोजित कार्यक्रमात प्रगती फाउंडेशन तर्फे ‘बीर बिरसा मुंडा आंतरराष्ट्रीय सन्मान पुरस्कार’ प्रदान करण्यात आला. या सोहळ्यात देश-विदेशातून आलेल्या दोनशेहून अधिक रक्तदाते व समाजसेवकांचा त्यांच्या उल्लेखनीय कार्याबद्दल गौरव करण्यात आला.
समाजकार्यातील सातत्यपूर्ण योगदानामुळे अभय तेलतुंबडे यांना यापूर्वीही विविध राष्ट्रीय व आंतरराष्ट्रीय पुरस्कारांनी सन्मानित करण्यात आले आहे. कोटा नॅशनल प्राईड 2022सह पंजाबमधील भटिंडा, बिहारमधील दरभंगा व गया, तेलंगणातील हैदराबाद तसेच राजस्थानमधील भीमनाल येथेही त्यांना विविध पुरस्कार प्राप्त झाले आहेत.अभय तेलतुंबडे यांनी आतापर्यंत 126 वेळा रक्तदान केले असून अनेक ठिकाणी रक्तदान शिबिरांचे आयोजन करून हजारो रुग्णांना जीवनदान देण्याचे कार्य केले आहे. साईसेवा व मुठेवाडगाव रक्तदान परिवार यांच्या माध्यमातून त्यांनी अनेकांच्या आयुष्यात नवसंजीवनी निर्माण केली आहे. तरुणांना रक्तदानासाठी प्रेरित करण्याबरोबरच थॅलेसेमिया व सिकलसेल निर्मूलनाबाबत जनजागृती, तसेच अवयवदान व देहदानाबाबतही ते सातत्याने प्रचार-प्रसार करत आहेत.
कोरोना काळात त्यांनी राज्यभर विविध प्रकारे मदतकार्य केले होते. त्या योगदानाबद्दल शासनाकडून त्यांना ‘कोरोना योद्धा’ पुरस्काराने गौरविण्यात आले. देशभरातील अनेक संस्थांनी त्यांना ऑनलाईन व ऑफलाईन पुरस्कार देऊन सन्मानित केले आहे.
सध्या अभय तेलतुंबडे हे सोशल अॅक्टिव्हिस्ट वेलफेअर असोसिएशन, भारत (नवी दिल्ली), सोनल फाउंडेशन आणि अरिहंताण रक्तसारथी संस्थान या संस्थांचे राज्य समन्वयक म्हणून कार्यरत आहेत.
या पुरस्कार सोहळ्यास नेपाळचे दीपक प्रसाद उपाध्याय, माजी आमदार हरिराम चौरो, कमलेश मोहन, भुवनेश्वर (ओडिशा) येथील क्राईम इन्व्हेस्टिगेटर संजुक्ता आचार्य, अॅड. शंकर, डॉ. दिनेश आचार्य, प्रगती फाउंडेशनचे अध्यक्ष दीपक अग्रहरी तसेच रणजित मिश्रा आदी मान्यवर उपस्थित होते. त्यांच्या हस्ते अभय तेलतुंबडे यांना मोमेंटो, शाल, प्रशस्तिपत्र आणि फीत देऊन गौरविण्यात आले.
अभय तेलतुंबडे यांच्या या यशाबद्दल परिसरातून मोठ्या प्रमाणात कौतुक होत असून विविध मान्यवर, पदाधिकारी आणि रक्तदान परिवारातील सदस्यांनी त्यांचे अभिनंदन केले आहे.
