श्रीरामपूर–
श्रीरामपूर शहरातील एका नामांकित मराठी शाळेत वर्ग शिक्षकाने चार अल्पवयीन मुलींवर लैंगिक अत्याचार केल्याच्या गंभीर प्रकरणाची दखल घेत महाराष्ट्र राज्य महिला आयोग यांनी कठोर कारवाईचे निर्देश दिले आहेत.या प्रकरणी रिपाईचे जिल्हा कार्याध्यक्ष सुभाष त्रिभुवन यांनी महिला आयोगाच्या अध्यक्षा रूपाली चाकणकर यांच्याशी दूरध्वनीवर संपर्क साधून तसेच लेखी निवेदनाद्वारे तक्रार दाखल केली होती. तक्रारीची गंभीर दखल घेत आयोगाच्या अध्यक्षा यांनी तात्काळ कारवाईचे आदेश दिले.
आयोग कार्यालयातील समुपदेशक दुर्गा लांघी यांच्या माध्यमातून जिल्हा पोलीस प्रमुख सोमनाथ वाकचौरे यांना १३ फेब्रुवारी रोजी पत्र पाठवण्यात आले. संबंधित पत्रात श्रीरामपूर तालुक्यातील प्राथमिक शाळेतील शिक्षकावर चार अल्पवयीन मुलींवर अत्याचार केल्याचा आरोप असल्याचे नमूद करण्यात आले आहे. ही घटना अत्यंत निंदनीय असून शिक्षण व्यवस्थेवर प्रश्नचिन्ह निर्माण करणारी असल्याचे आयोगाने स्पष्ट केले आहे.
आयोगाने संबंधित प्रकरणात बालकांचे लैंगिक अपराधांपासून संरक्षण अधिनियम २०१२ (POCSO) अंतर्गत तात्काळ गुन्हा दाखल करून उच्चस्तरीय सखोल चौकशी सुरू करण्याचे आदेश दिले आहेत. तसेच भविष्यात अशा घटना टाळण्यासाठी संबंधित शाळा व कार्यक्षेत्रातील इतर शाळांमध्ये बालसुरक्षा नियमांचे कठोर पालन होते की नाही याचा तातडीने आढावा घेण्याच्या सूचनाही देण्यात आल्या आहेत.
या संवेदनशील प्रकरणात जिल्हा पोलीस प्रमुख सोमनाथ घारगे यांना स्वतः लक्ष घालून पीडित मुलींना न्याय मिळेल आणि दोषींवर कठोर कायदेशीर कारवाई होईल, याची खात्री करण्याचे निर्देश आयोगाने दिले असून केलेल्या कारवाईचा सविस्तर अहवाल तात्काळ महिला आयोगाकडे सादर करण्यास सांगितले आहे.
