श्रीरामपूर–
श्रीरामपूर शहराच्या विविध विकास कामांसाठी जिल्ह्याचे पालकमंत्री ना.राधाकृष्ण विखे पाटील यांच्या प्रयत्नाने सुमारे ५ कोटी ५८ लाख रुपये खर्चाच्या विकास कामांना प्रशासकीय मान्यता देण्यात आली आहे. तसेच पालकमंत्री ना.विखे पाटील यांच्या विशेष निधीतून शहरातील नेवासा-संगमनेर रस्त्या करिता २ कोटी रुपये रुपयांचा निधी मंजूर करण्यात आला असल्याची माहिती माजी नगरसेवक आशिष धनवटे व भाजपा शहराध्यक्ष जितेंद्र छाजेड यांनी दिली.
श्रीरामपूर शहरातील विविध विकास कामांचा प्रस्ताव प्रशासकीय मान्यतेसाठी सादर करण्यात आलेल्या होता.त्याला प्रशासकीय मान्यता मिळाली असून नामदार विखे पाटील यांच्या प्रयत्नामुळे हा निधी मंजूर झाला आहे.त्यामध्ये नागरी दलितेतर वस्ती सुधार योजना अंतर्गत २४ कामांचा समावेश असून त्याकरिता २ कोटी ७१ लक्ष रुपये तर महाराष्ट्र सुवर्ण जयंती नगरोत्थान महाभियान (जिल्हास्तर)अंतर्गत २५ कामांसाठी २ कोटी ८७ लक्ष ९९ हजार रुपयांच्या निधीस प्रशासकीय मान्यता देण्यात आली आहे. या ५ कोटी ५८ लाख रुपये खर्चाच्या निधीतून शहरातील विविध भागांमधील भूमिगत गटारी, रस्त्यांचे मजबुतीकरण, काँक्रिटीकरण व डांबरीकरणाची विकास कामे करण्यात येणार आहेत. त्याचबरोबर शहरातील अतिशय महत्त्वाचा समजला जाणारा नेवासा संगमनेर रस्ता अतिशय खराब झालेला आहे.या रस्त्याच्या डांबरीकरणासाठी पालकमंत्री ना.विखे पाटील यांच्या विशेष निधीतून सुमारे २ कोटी रुपयांचा निधी मंजूर करण्यात आला आहे.श्रीरामपूर शहरातील विविध विकास कामांसाठी पालकमंत्री ना.विखे पाटील यांच्या माध्यमातून आत्ता पर्यंत मोठ्या प्रमाणात विकास निधी शहराच्या विकासासाठी मिळालेला आहे.शेवटच्या टप्प्यामध्ये सुमारे ७ कोटी ५८ लक्ष रुपयांचा निधी मिळाल्याने उर्वरित कामे होणार आहेत. या कामांना प्रशासकीय मान्यता मिळून निधी मंजूर झाल्याने येत्या दोन महिन्यात ही सर्व कामे पूर्ण होणार असल्याची माहिती श्री.धनवटे व श्री छाजेड यांनी दिली.
