श्रीरामपूर-
श्रीरामपूर नगरपालिका निवडणुकीच्या तोंडावर अगदी काही दिवसांपूर्वी शिवसेना शिंदे गटात प्रवेश करणारे माजी नगरसेवक संजय छल्लारे यांनी आज दि.१७ रोजी उमेदवारी अर्ज दाखल करण्याच्या अखेरच्या दिवशी भाजपात प्रवेश केला. त्यांच्या समवेत नुकतेच काँग्रेस पक्षात गेलेले मर्चंटचे संचालक दत्तात्रय धालपे यांनीही भाजपत प्रवेश केला. मा. खा. सुजय विखे पाटील यांनी दोघांचेही पक्षात स्वागत केले.तसेच माजी नगरसेवक संजय छल्लारे यांची प्रभाग १५ मधून भाजपचे अधिकृत उमेदवार म्हणून विखे पाटील यांनी घोषणा केली.
नगरपालिका निवडणूक जशी जवळ येत आहे.तशा नाट्यमय राजकीय घडामोडी घडताना दिसत आहेत.
आज उमेदवारी अर्ज दाखल करण्याच्या शेवटच्या दिवसापर्यंत नेते मंडळींचे पक्षांतर सुरूच होते.गेल्या ८ दिवसांपूर्वी माजी महसूलमंत्री बाळासाहेब थोरात यांच्या उपस्थितीत काँग्रेसवासी झालेले मर्चंटचे संचालक दत्तात्रय धालपे यांनी भाजपात उडी घेतली.सुमारे दीडएक वर्षांपूर्वी काँग्रेस मध्ये असलेले श्रीरामपूर नगरपालिकेचे माजी उपनगराध्यक्ष संजय छल्लारे यांनी सुरवातीला उबाठा शिवसेनेत प्रवेश केला.मग निवडणूकीच्या तोंडावर त्यांनी उपमुख्यमंत्री एकनाथ शिंदे यांच्या शिवसेनेचा भगवा आपल्या हातात घेतला. त्यांनंतर आज उमेदवारी अर्ज दाखल करण्याच्या अखेरच्या दिवशी सेनेला जय महाराष्ट्र करत भाजपत प्रवेश केला आहे.माजी खासदार सुजय विखे पाटील यांच्या उपस्थितीत या दोघांनीही भाजपमध्ये प्रवेश केला.
