श्रीरामपूर-
श्रीरामपूर नगरपरिषद निवडणुकीच्या पार्श्वभूमीवर अर्ज दाखल करण्याच्या प्रक्रियेला शुक्रवारी गती मिळाली असून नगराध्यक्षापदासाठी तब्बल चार जणांनी, तर नगरसेवक पदासाठी दहा उमेदवारांनी अर्ज दाखल केल्याची माहिती सहायक निवडणूक निर्णय अधिकारी मच्छिंद्र घोलप यांनी दिली.
घोलप यांनी सांगितले की, नगराध्यक्षा पदासाठी संजय छल्लारे, अशोक थोरे, निलेश भालेराव आणि जोएफ शेख या चार उमेदवारांनी अधिकृतरीत्या अर्ज दाखल केले आहेत. दरम्यान, नगरसेवक पदासाठी एकूण १० अर्ज दाखल केले, त्यामध्ये वसंत कोल्हे, रोहित शिंदे, जावेद पठाण, रवींद्र खिलारी, वैशाली पोटे, प्रसाद चौधरी, स्नेहल खोरे, निलोफर शेख, प्रकाश अहिरे आणि दिपाली मोरगे या उमेदवारांचा समावेश आहे. आगामी काही दिवसांत आणखी काही उमेदवार उमेदवारी अर्ज दाखल करण्याची शक्यता नाकारता येत नाही. त्यामुळे नगराध्यक्षा आणि नगरसेवक पदांची लढत अधिक रोचक होण्याचे संकेत मिळत आहेत. शहरातील मतदारांची भूमिका, स्थानिक राजकीय समीकरणे आणि विविध गटांतील अंतर्गत हालचाली यावरच या निवडणुकीचा अंतिम निकाल मोठ्या प्रमाणात अवलंबून राहणार आहे.
