श्रीरामपूर-
अहिल्यानगर जिल्ह्यातील बनावट चलनी नोटा तयार करणारे रॅकेट उघड करुन सराईत गुन्हेगारांना जेरबंद करण्यात अहिल्यानगर तालुका पोलीस स्टेशनच्या पथकाला यश आले आहे. आरोपींकडून तब्बल 88 लाखांचा मुद्देमाल जप्त करण्यात आला असून 6 आरोपींना अटक करण्यात आली आहे. जिल्हा पोलीस अधीक्षक सोमनाथ घार्गे यांनी याविषयी पत्रकार परिषदेत सविस्तर माहिती दिली. नगर तालुका पोलीस स्टेशनच्या तपास पथकाने बनावट चलनी नोटांचे रॅकेट उघडकीस आणत मोठी कारवाई केली. 27 जुलै 2025 रोजी आंबीलवाडी शिवारात पाचशे रुपयांच्या बनावट नोटांसह फिरणाऱ्या निखील शिवाजी गांगर्डे (वय 27, रा. कुंभळी, ता. कर्जत) आणि सोमनाथ माणिक शिंदे (वय 25, रा. तपोवन रोड) यांना महिंद्रा थार गाडीतून ताब्यात घेतले.
सपोनि प्रल्हाद गिते यांनी मिळालेल्या गोपनीय माहिती मिळाली की, दोन संशयित काळ्या महिंद्रा थारमधून बनावट नोटा घेऊन आंबीलवाडी शिवारात सिगारेट खरेदी करत आहेत. पथकाने तात्काळ सापळा रचून निखील गांगर्डे आणि सोमनाथ शिंदे यांना ताब्यात घेतले. त्यांच्याकडून 80 हजार रुपयांच्या बनावट नोटा जप्त झाल्या.पुढील तपासात बीड आणि छत्रपती संभाजीनगरमधून प्रदिप संजय कापरे (वय 28, रा. तिंतरवणी, ता. शिरूर कासार), मंगेश पंढरी शिरसाठ (वय 40, रा. शिवाजी नगर), विनोद दामोधर अरबट (वय 53, रा. सातारा परिसर), आकाश प्रकाश बनसोडे (वय 27, रा. निसर्ग कॉलनी), अनिल सुधाकर पवार (वय 34, रा. मुकुंदनगर) आणि अंबादास रामभाऊ ससाणे (रा. टाकळी, ता. शेवगाव, फरार) यांचा सहभाग निष्पन्न झाला.पोलिसांनी 59 लाख 50 हजार रुपयांच्या बनावट नोटा, 2 लाख 16 हजर रुपयांचे कागद आणि शाई, तसेच 27 लाख 90 हजार 600 रुपयांचे मशीन, संगणक आदी साहित्य जप्त केले. एकूण 88 लाख 20 हजार 600 रुपयांचा मुद्देमाल पोलिसांनी हस्तगत केला आहे. या कारवाईत सपोनि प्रल्हाद गिते, पोसई भरत धुमाळ, पोहेकॉ सुभाष थोरात, रविकिरण सोनटक्के, बाबासाहेब खेडकर, मंगेश खरमाळे, शरद वांढेकर, खंडू शिंदे, सागर मिसाळ, राजू खेडकर, विक्रांत भालसिंग आणि मोहिनी कर्डक यांचा सहभाग होता. पोलीस अधीक्षक सोमनाथ घार्गे, अपर पोलीस अधीक्षक वैभव कलुबर्मे आणि उपविभागीय अधिकारी अमोल भारती यांच्या मार्गदर्शनाखाली ही कारवाई करण्यात आली.
