श्रीरामपूर-
श्रीरामपूर तालुक्यातील हिंदुत्ववादी नेते तसेच भाजपचे प्रकाश चित्ते यांच्या विरोधात एका महिलेने केलेल्या तक्रारीवरून अट्रोसीटीसह विविध कलमाअंतर्गत श्रीरामपूर शहर पोलीस ठाण्यात गुन्हा दाखल झाला आहे.चित्ते यांच्यासह रिजवान कुरेशी या अन्य एका जणाविरुद्ध हा गुन्हा दाखल झाल्याने तालुक्याच्या राजकीय वर्तुळात मोठी खळबळ उडाली आहे.
याबाबत पुणे येथे राहणाऱ्या महिलेने श्रीरामपुर शहर पोलीस स्टेशनमध्ये दिलेल्या फिर्यादीत म्हटले आहे की, मी वरील ठिकाणी मोलमजुरी करुन त्यावर उदरनिर्वाह भागविते. मी मुल्ला कटर याचेविरुध्द मी
श्रीरामपुर शहर पोलीस स्टेशनला गुन्हा रजि. नं.। 666/2022 नुसार अत्याचाराचा गुन्हा दाखल केला आहे. सदर गुन्ह्याची सुनावणी सध्या सेशन कोर्ट, श्रीरामपुर येथे चालु आहे. माझा सदरच्या केसच्या कामकाजाची माहिती घेण्यासाठी मला अधुन मधुन श्रीरामपुर येथे यावे लागते. साधारण 8 ते 10 दिवसापुर्वी मी माझ्या खाजगी कामासाठी श्रीरामपुर येथे आले होते. माझे कामकाज आटोपुन दुपारच्या वेळी मी पुण्याला परत जाण्यासाठी निघाले होते.श्रीरामपुर बस स्टॅन्डकडे जाण्यासाठी मी नेवासारोडचा बोगदा ओलांडुन पुढे चालत जात असताना एक पांढऱ्या रंगाच्या स्कुटीवर श्रीरामपुर येथील मी ओळखत असलेले प्रकाश चित्ते हे माझ्या जवळ आले व मला त्यांनी थांबण्यास सांगितले. मी थांबल्यानंतर ते मला म्हणाले की, ‘तु मुल्ला कटरच्या विरुध्द साक्ष देवू नको. त्याने काहीच केले नाही, असे तु कोर्टात सांग. तो माझा कार्यकर्ता आहे. तु माझ्या सांगण्याप्रमाणे साक्ष दिली तर तुला मी 2 लाख रुपये देईल आणि माझे ऐकले नाही तर तुला कुठे संपवुन टाकील ते कळणार नाही. तु पुढच्या वेळी श्रीरामपुरला आली की, मुल्ला कटरचा भाऊ तुला भेटेल. तेव्हा तुला 50 हजार रुपये देईल. बाकी पैसे काम झाल्यावर भेटतील’,असे म्हणुन ते तेथुन निघुन गेले. त्यानंतर घाबरुन मी श्रीरामपुर बस स्टॅन्ड येथुन बस पकडुन पुण्याला निघुन गेले. घाबरुन मी याबाबत कुणालाही सांगितले नाही. दिनांक 19/07/2025 रोजी माझी वरील गुन्हयात साक्ष असल्याने दिनांक 15/07/2025 रोजी माझे केसची माहिती घेण्यासाठी मी श्रीरामपुर कोर्टात आले होते. त्याकरीता मी पुण्यावरुन बसने रात्री नेवासा फाटा येथे उतरले. तिथे मी एका लॉजवर रुम घेऊन राहीले. तेव्हा तेथे सकाळी गुन्हा दाखल केलेला आरोपी मुल्ला कटरचा भाऊ रिजवान कुरेशी आला व म्हणाला की, माझ्यासोबत गुपचुप चल.मी त्याच्या गाडीवर बसून श्रीरामपुर कोर्टात गेले. तिथे एक वकिल होते. त्या ठिकाणी त्यांनी माझे एका को-या कागदावर सही व अंगठे घेतले. त्यानंतर मी कोर्टापासुन रिक्षा भाडोत्री केली व मला बस स्टॅण्डला सोडण्यास सांगितले. मी रिक्षात बसुन श्रीरामपुर बस स्टॅण्ड येथे उतरले. तेव्हा माझ्या लक्षात आले की, मुल्ला कटरचा भाऊ रिजवान हा माझा पाठलाग करत आहे. मी रिक्षाने नेवासा रोडने जात असताना अंदाजे दुपारी 03/30 वा सुमारास रेल्वे उड्डाणपुलावर रिक्षा येताच रिजवान कुरेशी याने रिक्षा थांबवली. तो मला म्हणाला की, तु माझा भाऊ याच्या विरुध्द साक्ष दिली तर आम्ही तुला मारुन टाकू. तु जर आमच्या बाजूने साक्ष दिली तर आम्ही तुला 2 लाख रुपये देऊ. वाटल्यास लगेच आता तुला 50 हजार रुपये देतो.असे म्हणत जातीवाचक शिवीगाळ करून माझ्या भावाच्या विरुध्द जर साक्ष दिली तर तुला मारुन टाकील अशी धमकी दिली. त्याचवेळी तिथे माझे ओळखीचा एक जण आला असता रिजवान कुरेशी तेथुन निघुन गेला. तेव्हा माझी खात्री झाली की, प्रकाश चित्ते यांच्या सांगण्यावरुनच आज रोजी रिजवान कुरेशी याने मला धमकी दिली. त्यांनतर आम्ही तक्रार देण्याकरीता श्रीरामपुर शहर पोलीस स्टेशनला आलो, असे शेवटी फिर्यादीत म्हटले आहे. सदर महिलेच्या फिर्यादीवरून श्रीरामपूर पोलिसांनी प्रकाश चित्ते व रिजवान कुरेशी यांचेविरुद्ध,
भारतीय न्याय संहिता (बी एन एस), 2023 -232
भारतीय न्याय संहिता (बी एन एस), 2023 – 126(2)
भारतीय न्याय संहिता (बी एन एस), 2023 – 351(2)
भारतीय न्याय संहिता (बी एन एस), 2023-49
अनुसूचीत जाती आणि अनुसूचीत जमाती (अत्याचार प्रतिबंधक) अधिनियम, १९८९ -3(1)(r)(s) नुसार गुन्हा दाखल केला आहे.या गुन्ह्याचा पुढील तपास श्रीरामपूर शहर पोलीस ठाण्याचे पो.नि. नितीन देशमुख हे करत आहेत.
