श्रीरामपूर-
शहरातील आदर्श लॉजवर पोलिसांनी कडक कारवाई करत एक वर्षाच्या कालावधीसाठी बंद करण्याचे आदेश काढले आहेत.त्यानुसार पोलीस स्टेशनकडून सदर लॉज सिल करण्यात आले असून पोलीस प्रशासनाने सामाजिक शांतता व सुरक्षितता राखण्यासाठी हे पाऊल उचलले असल्याचे पोलिसांनी स्पष्ट केले आहे.
याबाबत सविस्तर माहिती अशी की,
दिनांक ०४/०९/२०२५ रोजी अपर पोलीस अधीक्षक सोमनाथ वाघचौरे यांना शहरात आदर्श लॉज येथील मॅनेजर धीरज प्रमोद बिंगले हा मुलींना पैशाचे अमिष देवून देहव्यापारास प्रवृत्त करुन सदर लॉजवर जागा उपलब्ध करुन देत कुंटणखाना (वेश्याव्यवसाय) चालवत आहे,अशी खात्रीशीर माहिती मिळाल्याने अपर पोलीस अधीक्षक यांनी उपविभागीय पोलीस अधिकारी व पोलीस निरीक्षक यांना तात्काळ कारवाई करण्याचे आदेश दिले. त्यावरुन पो.नि. नितीन देशमुख यांनी पोलीस पथक तयार करुन बनावट ग्राहक तसेच दोन पंचासह सापळा रचत कारवाई केली असता तेथे धीरज प्रमोद बिंगले, वय ३५ वर्ष, धंदा मॅनेजर आदर्श लॉज, रा. रंगोली रोड, वार्ड क्रं.५, श्रीरामपुर हा मिळुन आला. तसेच सदर लॉज मध्ये ३ पिडीत महिलाही मिळून आल्या. सदर मॅनेजर व त्याचा साथीदार अहमद शेख, रा. बाबरपुरी, वार्ड नं.२, श्रीरामपुर (फरार) हे सदर महिलांकडुन वेश्याव्यवसाय करुन घेत असल्याचे तपासात समजले. यावरुन श्रीरामपुर शहर पोलीस स्टेशन येथे दिनांक ०४/०९/२०२५ रोजी गु.र.नं. ८२३/२०२५ स्त्रिया व मुली अनैतिक व्यापार प्रतिबंध अधिनियम सन १९५६ चे कलम ३,४,५,७ अन्वये गुन्हा दाखल करण्यात आला होता.
सदर गुन्हयाचे तपासात अजुन चार आरोपी निष्पन्न झाले आहेत. सदर लॉजचे चालक गुन्हयातील पिडीत महिला यांना पैश्याचे अमिष दाखवुन त्यांचे कडुन वेश्या व्यवसाय करुन घेवुन अनैतिक देह व्यापारातुन मिळणारा पैसा स्वतःकडे घेत असतात. त्यामुळे सदर गुन्हयात त्यांना आरोपी करण्यात आले आहे. यापुर्वी देखील सदर लॉजवर दि.१०/०१/२०२४ रोजी छापा टाकण्यात आला होता.पोलीस प्रशासनाच्या असे निदर्शनास आले की, सदर हॉटेल चालक व मालक यांच्या वर्तनात कोणतीही सुधारणा झाली नसल्याने तसेच सदर लॉज हे धार्मिक स्थळ श्रीराम मंदिर, पार्श्वनाथ दिंगबर जैन मंदिर, गणपती मंदिर आणि नुराणी मस्जिद या सार्वजनिक व धार्मिक स्थळापासुन नजीकच आहे म्हणून आदर्श लॉजचे चालक व मालक यांचे विरोधात सक्त पाऊल उचलणे गरजेचे असल्याने पोलीस प्रशासनाने जिल्हाधिकारी यांचेकडे लॉजचा परवाना रदद करणेबाबत प्रस्ताव सादर केला होता.त्यावरुन जिल्हाधिकारी यांनी उपविभागीय दंडाधिकारी, श्रीरामपुर भाग श्रीरामपुर यांना उचित कारवाई करण्याचे निर्देष दिले होते. दिनांक ०९/०२/२०२६ रोजी आदर्श लॉज रंगोली रोड, वॉर्ड क्रं.५, श्रीरामपुर, ता. श्रीरामपुर, जि. अहिल्यानगर हे एक वर्षाच्या कालावधीसाठी बंद करण्याचे आदेश दिलेले आहेत.त्यानुसार पोलीस स्टेशनकडून सदर लॉज सिलबंद करण्यात आले आहे.
