श्रीरामपूर-
अत्याचार केल्याचा खोटा गुन्हा दाखल करण्याची धमकी देत महिलेने श्रीरामपूर येथील शिक्षकाकडून 3 लाख रुपये उकळल्याचा गंभीर प्रकार समोर आला आहे.याबाबत या शिक्षकाच्या फिर्यादीवरून सदर महिलेवर गुन्हा दाखल करण्यात आला आहे.
सदर महिलेने गोड गोड बोलून या शिक्षकाची सर्व माहिती काढून घेत त्याच्याशी सतत मोबाईवर संपर्कात राहत नंतर अत्याचाराच्या गुन्ह्याची धमकी देत १० लाख रुपयांची मागणी त्या शिक्षकाकडे केली. त्यातील ३ लाख रुपये या शिक्षकाने भितीपोटी सदर महिलेला दिलेही होते.
याबाबत फिर्यादी महेश लहू कोल्हे, रा.उत्सव मंगल कार्यालय रोड, वॉर्ड नं.७, श्रीरामपूर यांनी शहर पोलिसांत दिलेल्या फिर्यादीत म्हटले आहे की, आपण क्रिडा शिक्षक असून राज्यस्तरीय कबड्डी स्पर्धेसाठी येणाऱ्या मुलांना श्रीरामपुरातील एका लॉज येथे थांबवत असतो. सप्टेंबर २०२४ मध्ये क्रिडा स्पर्धेकरीता आलेल्या विद्यार्थ्यांना आपण या लॉजवर थांबवले होते. तेथे मला संबंधित महिला भेटली. तिने आपला मोबाईल नंबर घेवून आपल्याशी मैत्री केली.आपली नोकरी, कौटुंबिक तसेच आर्थिक स्थितीबाबत माहिती तिने काढून घेतली. सदर महिलेशी आपण फोनवर बोलायचो मात्र तिला कधीही एकांतात भेटलो नाही. ऑक्टोबर २०२५ पासून अचानक सदर महिला आपल्याला १० लाख रूपयांची मागणी करू लागली. तेव्हा मी पैसे का देऊ? असे म्हटल्याने त्याचा राग येवून तू जर मला पैसे दिले नाही तर मी तुझ्यावर बलात्काराचा खोटा गुन्हा दाखल करून मी तुला जेलमध्ये बसवेन, तुझ्या परिवाराची बदनामी करेल, असे तिने धमकावले.
दरम्यान बदनामीच्या भितीने आपण घरातील सोने गहाण ठेवून या महिलेस २ लाख रूपये रोख स्वरूपात दिले. तेव्हा सदर महिला काही करणार नाही असे वाटले. परंतु नोव्हेंबर २०२५ मध्ये रात्री आपल्या घराजवळ येवून आरडाओरडा करून सदर महिलेने दगडफेक केली व वडीलांना दम दिला. तेव्हा आपल्या वडीलांनी शहर पोलिसात तक्रार दिल्याने अदखलपात्र गुन्हा दाखल करण्यात आला होता. त्यानंतर पुन्हा या महिलेने घरी येऊन गोंधळ घातला. तेव्हा पुन्हा घरच्यांनी पोलिसात तक्रार दिली. पुन्हा या महिलेने गोंधळ करू नये म्हणून तिला आपण आणखी १ लाख असे एकूण आतापर्यंत 3 लाख रूपये दिले. सदर प्रकारामुळे आपण गोंधळलेलो असताना आपल्याला समजले की सदर महिलेने यापूर्वीही एका इसमाशी अशीच ओळख करून त्याच्याविरोधातही श्रीरामपूर कोर्टामध्ये बलात्काराचा खोटा गुन्हा दाखल केला होता. नंतर या महिलेने तडजोड करून केस मागे घेतली. त्यामुळे आपल्याही विरोधात ही महिला खोटा गुन्हा दाखल करेल, अशी भिती वाटल्याने आपण पोलिसात सदर महिलेच्या विरोधात गुन्हा दाखल केला आहे. सदर फिर्यादीवरून पोलिसांनी त्या महिलेविरूद्ध गुन्हा दाखल केला आहे. पुढील तपास श्रीरामपूर शहर पोलीस स्टेशनचे पोलीस निरीक्षक नितीन देशमुख यांच्या मार्गदर्शनाखाली पोउनि. जाधव हे करीत आहेत.
