श्रीरामपूर-
श्रीरामपूर येथील पाटबंधारे विभागाच्या वसाहतीतील एका बंद आणि पडक्या खोलीत एका तरुणाचा मृतदेह
कुजलेल्या अवस्थेत आढळला. महेश डोरले असे या तरुणाचे नाव होते.गेल्या दोन महिन्यांपासून बेपत्ता असलेल्या या तरुणाचा मृतदेह कुजलेल्या अवस्थेत आढळून आल्याने शहरासह तालुक्यात मोठी खळबळ उडाली आहे.सदर मृतदेह इतका कुजला होता की, तो ओळखणे पोलिसांनाही अशक्य होते.पोलिसांनी अथक प्रयत्न करून तब्बल चार तासात मृताची ओळख पटवली. तसेच मृतदेह पूर्णपणे कुजलेला असल्याने शीर धडापासून वेगळे झालेले होते.
ऐन गणेश विसर्जनाच्या दिवशी ही दुर्दैवी घटना समोर आल्याने शहरात शोककळा पसरली आहे. ५ जुलै रोजी गोंधवणी रोड, वॉर्ड नं. १ येथील रहिवासी असलेला महेश डोरले हा युवक अचानकपणे बेपत्ता झाला होता. त्यानंतर त्याच्या कुटुंबीयांनी ६ जुलै रोजी महेश बेपत्ता झाल्या संदर्भात पोलिसांत तक्रार दाखल केली. पोलिसांनी तपास सुरू केला, मात्र महेशचा कुठेच थांगपत्ता लागत नव्हता. अखेर, दोन महिन्यांनंतर त्याचा मृतदेह पाटबंधारे विभागाच्या वसाहतीमधील एका पडक्या खोलीत त्याचा मृतदेह आढळला. या घटनेची माहिती मिळताच श्रीरामपूर शहर पोलीस स्टेशनचे पोलीस निरीक्षक नितीन देशमुख आणि सहाय्यक पोलीस निरीक्षक राम शिखरे यांच्यासह पोलीस पथक तातडीने घटनास्थळी दाखल झाले.पोलिसांच्या प्राथमिक अंदाजानुसार, महेशने गळफास घेऊन आत्महत्या केली असावी. मात्र, मृतदेह पूर्णपणे कुजल्याने या घटनेमागे अन्य काही कारण आहे का, याचाही तपास पोलीस करत आहेत.
