श्रीरामपूर-
गांजा बाळगल्याच्या गुन्ह्यात आरोपी न करता साक्षीदार करण्याच्या बदल्यात अहिल्यानगरच्या कोतवाली पोलीस ठाण्याचे सहाय्यक फौजदार यांनी तक्रारदार यांच्याकडे ५ लाख रुपयांच्या लाचेची मागणी केली होती.तडजोडीनंतर यातील दीड लाख रुपये उपमुख्यमंत्री अजित पवार यांच्या राष्ट्रवादी काँग्रेसचे कार्यकर्ते अशोक गायकवाड यांच्या मार्फत स्वीकारत असताना लाचलुचपत प्रतिबंधक विभागाच्या पथकाने त्यांना रंगेहाथ पकडले.दोन्ही आरोपींना पथकाने ताब्यात घेतले असून त्यांच्यावर तोफखाना पोलीस स्टेशन येथे भ्रष्टाचार प्रतिबंधक अधिनियम 1988 अन्वये गुन्हा दाखल करण्यात आला आहे.लाच घेताना अडकलेले अशोक गायकवाड यांनी अलीकडेच उपमुख्यमंत्री अजित पवार यांच्या नेतृत्वाखाली राष्ट्रवादी काँग्रेसमध्ये प्रवेश केला आहे.अजितदादा यांच्या पक्षात प्रवेश केल्यानंतर नगरमध्ये उभारण्यात आलेल्या भारतरत्न डॉ. बाबासाहेब आंबेडकर यांच्या पूर्णकृती पुतळ्याच्या अनावरण कार्यक्रमात गायकवाड यांचा पुढाकार होता. सुरुवातीच्या काळात ते रिपब्लिकन पक्षात होते. मंत्री रामदास आठवले यांच्या पक्षात त्यांनी काम केले. मधल्या काळात त्यांनी शिवसेना उद्धव बाळासाहेब ठाकरे पक्षातही काम केले. याबाबत सविस्तर माहिती अशी की,तक्रारदार यांना कोतवाली पोलीस स्टेशन येथे नोंदलेल्या गांजाच्या केसमध्ये आरोपी न करता साक्षीदार करण्याच्या मोबदल्यात त्यांच्याकडे कोतवाली पोलीस स्टेशनचे राजेंद्र प्रभाकर गर्गे, सहाय्यक फौजदार यांच्या वतीने मध्यस्थी करणाऱ्या अशोक रामचंद्र गायकवाड यांनी ५ लाख रुपयांच्या लाचेची मागणी केली होती. त्यानंतर तडजोडी अंती दिनांक २०/०८/२०२५ रोजी तक्रारदार यांच्याकडून लाचेची १,५०,००० रुपयांची रक्कम गायकवाड यांनी स्वीकारली.या लाचेच्या मागणीस सहाय्यक फौजदार राजेंद्र गर्गे यांनी प्रोत्साहन दिल्याचे लाच मागणी कारवाई दरम्यान स्पष्ट झाले. दिनांक २१/०८/२०२५ रोजी लावण्यात आलेल्या सापळा कारवाई दरम्यान तक्रारदार हे लाचेची रक्कम अशोक रामचंद्र गायकवाड यांना देत असताना त्यांना लाचलुचपत प्रतिबंधक विभागाने अटक केली आहे.याप्रकरणी अशोक रामचंद्र गायकवाड, खाजगी इसम वय 71, वर्षे व्यवसाय शेती , राहणार बिशोब लॉइड कॉलनी सावेडी, जिल्हा अहिल्या नगर, राजेंद्र प्रभाकर गर्गे वय 57 वर्ष सहाय्यक फौजदार कोतवाली पोलीस स्टेशन राहणार समर्थ नगर सावेडी जिल्हा अहिल्यानगर या दोघांवर गुन्हा दाखल करण्यात आला आहे.पोलीस निरीक्षक श्रीमती नेहा तुषार सूर्यवंशी यांच्या पथकाने ही कारवाई केली.यात पोलीस हवालदार विनोद चौधरी,चालक पोलीस हवालदार विनोद पवार, पोलीस कॉन्स्टेबल अनिल गांगोडे यांचा सहभाग होता.
