श्रीरामपूर:
गुन्हे उघडकीस आणण्यात आणि गुन्हेगारांवर कठोर कारवाई करण्यात विशेष कौशल्य असलेल्या व गुन्हेगारांचा कर्दनकाळ अशी ओळख असलेल्या पोलीस अधीक्षक सोमनाथ वाघचौरे यांची श्रीरामपूरच्या अप्पर पोलीस अधीक्षकपदी नियुक्ती करण्यात आली आहे.जिल्ह्यासह श्रीरामपूरातील ढासळत चाललेल्या कायदा-सुव्यवस्थेला रुळावर आणण्याचे शिवधनुष्य वाघचौरे यांना पेलावे लागणार आहे.वाघचौरे यांचे त्यांच्या पूर्वीच्या कार्यकाळापासून श्रीरामपूरकरांशी उत्तम ट्युनिंग आहे.अहिल्यानगर जिल्ह्यातील शिर्डी, श्रीरामपूर आणि संगमनेर उपविभागांमध्ये अनेक वर्षे पोलीस उपविभागीय अधिकारी म्हणून ते कार्यरत राहिलेले आहेत.संगमनेर व शिर्डी येथे कार्यरत असताना त्यांनी अनेक गंभीर गुन्ह्यांची यशस्वी उकल केली होती.उत्तर नगर जिल्ह्यातल्या गुन्हेगारी विश्वातील घडामोडींबाबत त्यांचा अभ्यास दांडगा आहे. अनेक संवेदनशील प्रकरणे त्यांनी आपल्या मागील कार्यकाळात यशस्वीपणे हाताळली आहेत.२०२४ मध्ये त्यांची पदोन्नती होऊन राज्य राखीव पोलीस दल गट क्रमांक ५ येथे नियुक्ती झाली होती. आता पुन्हा एकदा त्यांना श्रीरामपूर येथे पदोन्नती मिळाल्याने श्रीरामपूर शहरासह तालुक्यातील कायदा-सुव्यवस्थेचा बंदोबस्त करण्यात ते नक्की यशस्वी होतील अशी अपेक्षा व्यक्त केली जात आहे.श्रीरामपूरचे तत्कालीन अप्पर पोलीस अधीक्षक वैभव कलुबुर्गे यांची काही दिवसांपूर्वी अहिल्यानगर येथे बदली झाली होती. त्यांच्या बदलीनंतर श्रीरामपूर शहरात नव्या अधिकाऱ्याची प्रतीक्षा होती, ती आता समाप्त झाली आहे.
