श्रीरामपूर-
जिल्हास्तरीय कबड्डी स्पर्धा,कर्जत येथे आयोजित केल्या गेल्या होत्या. या स्पर्धेतील सामन्यादरम्यान मोठा राडा झाल्याची घटना घडली आहे.या स्पर्धेचा अंतिम सामना मुलांच्या न्यू इंग्लिश स्कूल, टाकळीभान विरुद्ध समर्थ विद्यालय,कर्जत या संघात झाला.हा सामना सुरू असतानाच अचानक प्रेक्षक मैदानात घुसले आणि त्यांनी टाकळीभानच्या खेळाडूंना मारहाण केली.यामध्ये टाकळीभान संघातील दोन खेळाडू जखमी झाल्याची माहिती समोर आली आहे.
कर्जत येथे १७ वर्षे वयोगटातील जिल्हास्तरीय कबड्डी स्पर्धेत मुलांच्या अंतिम सामन्यात हा वाद झाला. स्पर्धेतील मुलांच्या गटातील अंतिम सामना कर्जतमधील समर्थ विद्यालय विरुद्ध न्यू इंग्लिश स्कूल, टाकळीभान (ता. श्रीरामपूर) या संघात उशिराने सुरू झाला.यात स्थानिक संघाला प्रेक्षकांचा जास्त पाठिंबा मिळत होता.असे असले तरी टाकळीभानच्या संघाने सामन्यात आघाडी घेतलेली होती. त्यामुळे थोडा वाद निर्माण झाला. तो वाद विकोपाला गेल्यानंतर प्रेक्षकांनी मैदानात धाव घेतली. प्रेक्षकांनी केलेल्या मारहाणीत टाकळीभान येथील दोन कबड्डीपटू जखमी झाले.सुरक्षिततेच्या कारणास्तव टाकळीभान संघाने खेळण्यास असमर्थता दाखविली.याबाबत कर्जत पोलिस ठाण्यात गुन्हा दाखल नसला तरी या घटनेची चर्चा सर्वदूर झाली आहे. तसेच टाकळीभान, ता. श्रीरामपूर येथे ग्रामस्थांनी या घटनेचा निषेध व्यक्त केला आहे.
