श्रीरामपूर –
श्रीरामपूर येथील रामभाऊ सोपान नागरे ज्वेलर्स हे सोनाराचे दुकान फोडून चोरी करणाऱ्या 4 आरोपींना स्थानिक गुन्हे शाखेच्या पोलीस पथकाने जालना येथून अटक केली आहे. या चौघांकडून चोरी झालेल्या 11 किलो चांदीसह 14 लाखांचा मुद्देमाल पोलीस पथकाने जप्त केला आहे.
याबाबत सविस्तर माहिती अशी की, फिर्यादी निखील विजय नागरे, वय 34, धंदा सराफ (रामभाऊ सोपान नागरे ज्वेलर्स) रा.सद्गुरूकृपा, सावता रोड, वॉर्ड नं.03, श्रीरामपूर हे दि. 17/07/2025 रोजी रात्री 20.30 वा.सराफ दुकान बंद करून घरी गेले असता अज्ञात चोरटयांनी दुकानाचे शटर तोडून दुकानातील ड्रॉवर व कपाटामधील सोन्याचे दागीने व चांदीचे दागीने, लगड असा एकुण 26,59,745 रू. किंमतीचा मुद्देमाल चोरून नेल्याबाबत ची फिर्याद श्रीरामपूर शहर पोलीस स्टेशनला दाखल केली होती. सदर वरून पोलिसांनी गु.र.नं. 681/2025 बीएनएस कलम 305 (अ), 331 (4) प्रमाणे घरफोडीचा गुन्हा दाखल केला.पोलीस अधिक्षक यांनी स्थानिक गुन्हे शाखेस गुन्हा उघडकीस आणण्याचे आदेश दिले होते. त्यानुषंगाने पोनी. दिनेश आहेर यांनी स्थानिक गुन्हे शाखा व तपास पथकातील पोसई अनंत सालगुडे व पोलीस अंमलदार बाळासाहेब गुंजाळ, सुनिल मालणकर, भगवान थोरात, रमीजराजा आत्तार, अमृत आढाव, फुरकान शेख, प्रशांत राठोड व महादेव भांड यांचे पथक तयार करुन पथकास रवाना केले. पथकाने घटनाठिकाणी भेट देऊन, सीसीटीव्ही फुटेजची पाहणी करून नमूद गुन्हा हा गोपीसिंग टाक, रा.जालना व शिवाजी प्रल्हादराव सासनिक, रा.जालना अशांनी तयांच्या साथीदारांसह केल्याचे निष्पन्न झाले. दिनांक 22/07/2025 रोजी गोपनीय माहिती व तांत्रिक विश्लेषणाच्या आधारे आरोपी हे जालना येथे असल्याची माहिती पोलिसांना मिळाली.पथकाने मिळालेल्या माहितीवरून जालना तालुका पोलीस स्टेशन, जि.जालना येथे जाऊन जालना तालुका पोलीस स्टेशन येथील पोहेकॉ दत्तात्रय साळुबा मेहत्रे यांच्या मदतीने संशयीत आरोपीचा शोध घेऊन गोपीसिंग प्रल्हादसिंग टाक, वय 25, दिपकसिंग प्रल्हादसिंग टाक, वय 28 दोघे रा.सिध्दार्थनगर, ता.जि.जालना मुळ रा.गुरूगोविंदसिंगनगर, शिकलकरी मोहल्ला, टाक हाऊस, जालना, शिवाजी प्रल्हादराव सासनिक, वय 36, रा.रेणुकामाता मंदिराजवळ, गांधीनगर, जालना,अमित नंदलाल दागडिया,वय 32, रा.खरपुडी रोड, हरीगोविंदनगर, जालना यांना ताब्यात घेतले.
ताब्यातील आरोपीकडे सदर गुन्ह्याच्या अनुषंगाने चौकशी केली असता आरोपी गोपीसिंग प्रल्हादसिंग टाक याने त्याचे वरील साथीदारासह दि.17/07/2025 रोजीचे रात्री त्याच्याकडील होंडा कारमधुन जाऊन श्रीरामपूर, जि.अहिल्यानगर येथे सोनाराचे दुकानामध्ये चोरी केल्याचे कबूल केले.पोलिसांनी 14 लाख 7 हजार रूपये किंमतीचा मुद्देमाल जप्त केला. होंडा कंपनीची सीटीझेड एक्स कार क्रमांक एमएच-03-एझेड-5458, 5 मोबाईल, 11 किलो 230 ग्रॅम चांदीचे दागीने व लगड, 4 ग्रॅम वजनाचे सोन्याचे दागीने असा मुद्देमाल पोलिसांनी जप्त केला आहे.ताब्यातील आरोपी दिपकसिंग प्रल्हादसिंग टाक याच्यावर जालना जिल्हयातील विविध पोलीस स्टेशनला यापुर्वी दरोडा तयारी, घरफोडी व चोरीचे 14 गुन्हे दाखल आहेत.ताब्यातील आरोपीस गुन्ह्याचे तपासकामी श्रीरामपूर शहर पोलीस स्टेशन येथे मुद्देमालासह हजर करण्यात आले असुन गुन्हयाचा पुढील तपास श्रीरामपूर शहर पोलीस स्टेशन हे करीत आहे.सदर कारवाई पोलीस अधीक्षक सोमनाथ घार्गे,अपर पोलीस अधीक्षक सोमनाथ वाकचौरे,
उपविभागीय पोलीस अधिकारी बसवराज शिवपुजे यांच्या मार्गदर्शनाखाली स्थानिक गुन्हे शाखेच्या वरील पोलीस अधिकारी व अंमलदार यांनी केली.
