श्रीरामपूर-
श्रीरामपूर तालुक्यासह टाकळीभान परीसरात जादा परताव्याची लालसा दाखवुन एका कंपणीने हजारो तरुणांना गंडा घातल्याचे गंभीर प्रकरण उजेडात आले आहे. यात फसवणुक झालेल्या तरुणांची संख्या मोठ्या प्रमाणावर असून श्रीरामपूर तालुक्यासह परिसरात त्यामुळे मोठी खळबळ उडाली आहे. याबाबत टाकलीभान येथील सामाजिक कार्यकर्ते बापुसाहेब शिंदे यांनी अप्पर पोलिस अधिक्षक सोमनाथ वाघचौरे यांच्याकडे निवेदनाद्वारे तक्रार करुन संबधीत कंपनीवर कायदेशीर कारवाई करण्याची मागणी केली आहे.
या निवेदनात शिंदे यांनी म्हटले आहे कि, टाकळीभान येथे एका आॕनलाईन शेअर्स कंपणीकडुन टाकळीभान व परीसरात मोठ्या प्रमाणात कोट्यावधी रुपयांची फसवणूक झालेली आहे. माझा मुलगा शेखर बापूसाहेब शिंदे रा. टाकळीभान ता.श्रीरामपुर जि. अहिल्यानगर याची या ऑनलाईन ट्रेडिंग कंपनीद्वारे आर्थिक फसवणूक करण्यात आलेली आहे.
सदर कंपनीमार्फत माझ्या मुलास “ बोन चॕट ” या माध्यमातून विविध प्रकारचे मेसेज व चॅटिंग येत होते. त्या चॅटिंगद्वारे ऑनलाईन ट्रेडिंगमध्ये मोठा नफा मिळेल, असे आमिष दाखविण्यात आले. त्यानंतर वेळोवेळी झुम अॕपद्वारे मिटींग आयोजित करण्यात येत होती. त्या मिटिंगमध्ये वैजापुर .जि.संभाजीनगर व नागपूर येथील एक यांनी स्वतःला कंपनीचे प्रतिनिधी व ट्रेडिंग सल्लागार म्हणून सांगून माझ्या मुलाचा विश्वास संपादन केला.
त्यांच्या सांगण्यावरून माझ्या मुलाने विविध तारखांना ऑनलाईन पद्धतीने पैसे गुंतविले. सुरुवातीला नफा मिळत असल्याचे दाखविण्यात आले; मात्र नंतर पैसे परत मिळणे बंद झाले तसेच संबंधित व्यक्तींनी संपर्क टाळण्यास सुरुवात केली. त्यानंतर आमच्या निदर्शनास आले की, हा संपूर्ण प्रकार फसवणुकीचा असून माझ्या मुलाची आर्थिक फसवणूक करण्यात आलेली आहे.
सदर आरोपी यांनी संगनमताने खोटी माहिती, खोटे आश्वासन व मोठ्या नफ्याचे आमिष दाखवून अनेक लोकांकडून मोठ्या प्रमाणात पैसे उकळून घेतलेले आहेत. या आॕनलाईन कंपनीमार्फत टाकळीभान पंचक्रोशीमध्ये १५०० ते १६०० लोकांची आर्थिक फसवणूक झालेली आहे. सुरुवातीला सरासरी रुपये ३०,०००/- इतकी रक्कम गुंतवणूक म्हणून घेतली जात होती; मात्र अनेक व्यक्तींनी रुपये ९०,०००/-, १ लाख, ५ लाख, १० लाख, १५ लाख व त्यापेक्षाही अधिक रक्कम गुंतविलेली आहे.
सदर प्रकरणामध्ये एकूण कोट्यवधी रुपयांची फसवणूक झालेली असून, अंदाजे किमान रुपये १५ कोटींपेक्षा जास्त आर्थिक फसवणूक झालेली आहे. या प्रकरणासंबंधी आमच्याकडे संबंधित माहिती, व्यवहाराचे स्क्रीनशॉट, बँक व्यवहार तपशील, मोबाईल नंबर व इतर आवश्यक पुरावे उपलब्ध आहेत.
अनेक गरीब कुटुंबातील लोकांनी देखील त्यांच्या बोलण्यावर विश्वास ठेवून स्वतः ची व इतरांची गुंतवणूक केली असून त्यांची देखील आर्थिक फसवणूक झालेली आहे. त्यामुळे निष्पाप व फसवणूक झालेल्या लोकांना विनाकारण त्रास न देता स्थानिक मुख्य आरोपी व मुळ मास्टरमाइंड यांच्यावर कठोर कारवाई करण्यात यावी. तसेच सदर कंपनीविरुद्ध तात्काळ गुन्हा दाखल करून कठोर कायदेशीर कारवाई करण्यात यावी. तसेच या आर्थिक घोटाळ्याची सखोल चौकशी करून सर्व पीडित गुंतवणूकदारांना न्याय मिळवून द्यावा व फसवणूक झालेली रक्कम परत मिळवून द्यावी ही विनंती करण्यात आली आहे.
