श्रीरामपूर-
जामखेड तालुक्यातील दूध संकलन केंद्रावर छापा टाकून स्थानिक गुन्हे शाखेच्या पथकाने दुध तयार करण्यासाठी वापरले जाणारे 1198 लिटर पॅराफिनऑइल नावाचे केमीकल व दुध पावडर मिळुन आले.पोलिसांनी तीन जणांना अटक केली असून 17,32,816/- रु कि.चा मुद्देमाल जप्त करण्यात आला आहे.आरोपीत दोन जण राहुरी तालुक्यातील आहेत.
याबाबत अधिक माहिती अशी की,पोलीस अधीक्षक,सोमनाथ घार्गे यांनी स्थानिक गुन्हे शाखेला जिल्ह्यामध्ये दुध भेसळ करणाऱ्या इसमांची माहिती काढून त्यांचेविरुध्द कारवाई करणेबाबत आदेश दिले आहेत.त्या आदेशानुसार स्थानिक गुन्हे शाखेचे पोलीस निरीक्षक किरणकुमार कबाडी यांच्या नेतृत्वाखालील स्थानिक गुन्हे शाखेच्या पथकाने दि.14/02/2026 रोजी जामखेड पोलीस स्टेशन हद्दीत दुध भेसळ करणारे इसमांची माहिती काढत असताना रामदास नवनाथ उबाळे, रा.फक्राबाद ता.जामखेड हा त्याचे दुध संकलन केंद्रामध्ये केमीकल पासुन दुध तयार करुन ते संकलन झालेल्या दुधामध्ये मिक्स करत असल्याची माहिती प्राप्त झाली. त्यानंतर राजेश नामदेव बडे, अन्न सुरक्षा अधिकारी यांच्यासह रामदास उबाळे याच्या दुध संकलन केंद्रावर छापा टाकला. सदर ठिकाणी समीर कमरुद्दीन शेख वय- 30 वर्षे रा. उंबरे ता.राहुरी जि. अहिल्यानगर,आफताब कलीम शेख वय- 28 वर्षे रा. शुक्लेश्वर चौक, राहुरी ता. राहुरी जि. अहिल्यानगर, रामदास नवनाथ उबाळे वय- 46 वर्षे रा. फक्राबाद ता.जामखेड हे मिळुन आले. त्यानंतर पथकाने दुध संकलन केंद्राची ठिकाणची पाहणी केली असता सदर ठिकाणी दुध तयार करण्यासाठी वापरले जाणारे 6 ड्रममध्ये 1198 लिटर Paraffin oil नावाचे केमीकल व दुध पावडर मिळुन आले. या केमीकल बाबत ताब्यातील इसमांकडे विचारपुस करता त्यांनी सदरच्या केमीकल पासुन दुध तयार करण्यात येत असुन, 6 ड्रममधील केमीकल पासुन 24,000 लिटर दुध तयार होत असल्याचे सांगितले. ताब्यातील इसमांच्या कब्जातुन दुध तयार करण्यासाठी वापरले जाणारे 2,39,600/- रु. कि.चे 1198 लिटर Paraffin Oil, 81,056/- रु कि.ची प्लास्टिक बॅगमध्ये पांढ-या रंगाची 300 किलोग्रॅम पावडर, 12,160/- रु कि.चे 320 लिटर केमीकल पासुन तयार केलेले दुध, 14,00,000/- रु कि.चे दोन पिकअप वाहन असा एकुण 17,32,816/- रु कि.चा मुद्देमाल जप्त करण्यात आला आहे.
ताब्यातील आरोपींविरुद्ध जामखेड पोलीस ठाणे गु.र.नं. 84/2026 भारतीय न्याय संहिता 2023 चे कलम 274, 275, 123, 3(5) सह अन्न सुरक्षा व मानके कायदा 2006 चे कलम 26(1), 26(2)(i) शिक्षा कलम 57, 59 प्रमाणे गुन्हा दाखल करण्यात आला असुन पुढील तपास स्थानिक गुन्हे शाखा, अहिल्यानगर हे करीत आहे.
