श्रीरामपर-
श्रीरामपूर नगरपरिषदेच्या उपनगराध्यक्षपदी कांचन सानप यांची बिनविरोध निवड करण्यात आली आहे. तसेच स्वीकृत सदस्य म्हणून काँग्रेसकडून अंजुम शेख, डॉ. दिलीप शिरसाट व गोपाल लिंगायत तर भाजपकडून अपेक्षेप्रमाणे नगराध्यक्षपदाची निवडणूक लढवलेले श्रीनिवास बिहाणी यांचीच निवड जाहीर करण्यात आली.
नवनिर्वाचित नगराध्यक्ष करण ससाणे यांच्या अध्यक्षतेखाली नूतन पदाधिकाऱ्यांची पहिली सर्वसाधारण सभा यशवंतराव चव्हाण सभागृहात झाली. यावेळी मुख्याधिकारी मच्छिंद्र घोलप उपस्थित होते. सभेत नगरपरिषद अधिनियमानुसार उपनगराध्यक्ष व स्वीकृत सदस्य निवडीची प्रक्रिया पार पाडण्यात आली.
उपनगराध्यक्षपदासाठी कांचन सानप यांचे दोन अर्ज दाखल झाले होते. अन्य कोणताही अर्ज न आल्याने त्यांची बिनविरोध निवड जाहीर करण्यात आली.
स्वीकृत सदस्यांची नावे काँग्रेस व भाजप पक्षाच्या बैठकीत निश्चित करण्यात आली होती. त्यानुसार काँग्रेसकडून अंजुम शेख, डॉ. दिलीप शिरसाट व गोपाल लिंगायत, तर भाजपकडून श्रीनिवास बिहाणी यांची निवड करण्यात आली. सर्व निवडी बिनविरोध पार पडल्या. यावेळी काँग्रेसचे गटनेते मुजफ्फर शेख, भाजपच्या गटनेत्या वैशाली चव्हाण यांच्यासह नवनिर्वाचित सर्व नगरसेवक उपस्थित होते.
आमदार हेमंत ओगले यांनी निवड झालेल्या उपनगराध्यक्षा व स्वीकृत सदस्यांचा सत्कार केला.
