श्रीरामपूर-
नगरपालिका निवडणुकीसाठी झालेल्या मतदानाच्या मतपेट्या अतिशय कडेकोट सुरक्षा व्यवस्थेत तहसील कार्यालयातील हॉलमध्ये ठेवण्यात आल्या आहेत.यावर निगराणी ठेवण्यासाठी सीसीटीव्हीच्या माध्यमातून सुरक्षा यंत्रणा निर्माण करण्यात आली आहे.आवश्यकतेपेक्षा जास्त सीसीटीव्ही कॅमेरे लावल्याने स्ट्रॉंग रूम मधील या सुरक्षा व्यवस्थेचे चित्रीकरण केली जाणारी हार्डडिस्क पूर्ण भरत आल्याने ती काल सर्व उमेदवार,शासकीय अधिकारी व माध्यम प्रतिनिधींच्या साक्षीने बदलण्यात आली आणि नवीन हार्ड डिस्क टाकण्यात आली.
यावेळी नगराध्यक्षपदाचे उमेदवार श्रीनिवास बिहानी,प्रकाश चित्ते,अशोक थोरे,काँग्रेस प्रतिनिधी म्हणून मुजफ्फर शेख,रवि भांबारे,निलेश भालेराव,विविध प्रभागातील नगरसेवक पदाचे उमेदवार,सहाय्यक निवडणूक निर्णय अधिकारी तथा तहसीलदार मिलिंद कुमार वाघ,सहाय्यक निवडणूक अधिकारी तथा मुख्याधिकारी मच्छिंद्र घोलप,निवडणूक यंत्रणेची सर्व अधिकारी कर्मचारी,पत्रकार उपस्थित होते.
तहसीलदार वाघ यांनी सांगितले की या ठिकाणी जी हार्डडिस्क बसवण्यात आली आहे ती तशी पुरेशी होती परंतु आपण आवश्यकतेपेक्षा जास्त सीसीटीव्ही कॅमेरे लावल्यामुळे हार्ड डिस्क ला मर्यादा आल्या व चार दिवस पुरेल एवढा डाटात्यात शिल्लक होता.परंतु पुढील दोन-चार दिवसांचा प्रश्न निर्माण होणार असल्याने नवीन हार्ड डिस्क टाकण्यात आली आहे.त्यामुळे २१ तारखेच्या मतमोजणी पर्यंत चा सर्व डाटा आता यामध्ये साठवला जाणार आहे.यावेळी सर्व उमेदवार व प्रतिनिधींना स्ट्रॉंग रूम मधील सुरक्षा व्यवस्थेचे लाईव्ह चित्रीकरण दाखवण्यात आले.सर्वांच्या सह्या देखील यावेळी घेण्यात आल्या.बदललेली हार्ड डिस्क सुरक्षित पाकिटात ठेवून स्ट्रॉंग रूम मध्येच ठेवण्यात आली.सर्व उमेदवारांच्या उपस्थितीत खेळीमेळीच्या वातावरणात ही प्रक्रिया पार पडली.
