श्रीरामपूर-
काँग्रेसच्या अहिल्यानगर ग्रामीण प्रभारी जिल्हाध्यक्षपदी सचिन गुजर यांची नुकतीच निवड झाली आहे. त्याबाबतचे पत्र माजी महसूलमंत्री बाळासाहेब थोरात, प्रदेशाध्यक्ष हर्षवर्धन सपकाळ यांच्या मान्यतेने नुकतेच प्रसिद्ध झाले आहे.श्रीरामपूर तालुक्याला पुन्हा एकदा जिल्हाध्यक्षपदाचा मान मिळाला असून येणाऱ्या स्थानिक स्वराज्य संस्थांच्या निवडणूकांमध्ये पक्षाला नवी उभारी मिळवून देण्याचे मोठे आव्हान नूतन जिल्हाध्यक्ष गुजर यांच्यापुढे असणार आहे.सचिन गुजर हे गेल्या 30 वर्षांपासून काँग्रेस पक्षाचे काम करत आहेत.त्यामध्ये त्यांनी युवक काँग्रेसचे अध्यक्ष म्हणून तेरा वर्ष तर तालुका काँग्रेसचे अध्यक्ष म्हणून सात वर्ष काम पाहिले ते गेल्या पाच वर्षांपासून जिल्हा काँग्रेसचे कार्याध्यक्ष म्हणून कार्यरत होते. माजी मंत्री बाळासाहेब थोरात व माजी आमदार स्वर्गीय जयंतराव ससाणे यांचे विश्वासू सहकारी म्हणून त्यांची ओळख आहे.गुजर यांनी सहकार क्षेत्रात देखील काम केलेले आहे त्यामध्ये मुळा प्रवरा वीज संस्थेचे व्हाईस चेअरमन, कृषी उत्पन्न बाजार समितीचे उपसभापती, सभापती अशोक कारखान्याचे संचालक, गणेशखिंड देवस्थानचे विश्वस्त व गुजरवाडी येथील हनुमान गडाचे कार्याध्यक्ष म्हणून काम पाहत आहेत. जगप्रसिद्ध असलेल्या साईबाबा संस्थानच्या विश्वस्त म्हणून त्यांनी काम पाहिले. विशेषतः श्रीरामपूर विधानसभा मतदारसंघात माजी आमदार भानुदास मुरकुटे, जयंतराव ससाने, भाऊसाहेब कांबळे, लहू कानडे, आमदार हेमंत ओगले यांच्या विधानसभा निवडणुकीमध्ये त्यांनी विशेष मेहनत घेतली व या सगळ्याच निवडणुकांमध्ये काँग्रेस उमेदवार मोठ्या मताधिक्याने विजयी झाले आहे.तळागाळातील सर्वसामान्य जनतेशी थेट संपर्क ठेवून काम करणारा नेता म्हणजे सचिन गुजर अशी त्यांची ओळख आहे. स्व. जयंत ससाणे आणि त्यानंतर युवा नेते करण ससाणे यांच्या खांद्याला खांदा लावून ते श्रीरामपूर मध्ये काम करत आहे. त्यांची काँग्रेसच्या जिल्हाध्यक्षपदी निवड झाल्याने निश्चितच त्याचा फायदा येणाऱ्या स्थानिक स्वराज्य संस्थेच्या निवडणुकीमध्ये होणार आहे.सचिन गुजर यांची माजी महसूल मंत्री बाळासाहेब थोरात, आमदार हेमंत ओगले, युवा नेते करण ससाने, जिल्हा काँग्रेसचे शहराध्यक्ष दिप चव्हाण, प्रभावती ताई घोगरे, लताताई डांगे, प्रतापराव शेळके, बाबासाहेब दिघे, ज्ञानेश्वर मुरकुटे, सुधीर नवले, संपतराव मस्के, यांच्यासह आदींनी त्यांचे अभिनंदन केले आहे.
