श्रीरामपूर-
जिल्हा परिषद व पंचायत समितीच्या होऊ घातलेल्या
निवडणुकांच्या पार्श्वभूमीवर श्रीरामपूर तालुक्यातील चार गट व आठ गणांचे आरक्षण व लोकसंख्या विवरणपत्र जाहीर झाले आहे.गावगाड्याच्या राजकारणावर प्रभुत्व गाजवण्याची इर्षेने सर्वपक्षीय राजकीय धुरंधरांमध्ये आता धुरळा उडणार हे जवळपास निश्चित झाले आहे. नवीन आरक्षण सोडतीमुळे तालुक्यातील ग्रामीण भागाच्या राजकारणात नवी राजकीय समीकरणे दिसून आल्यास नवल वाटू नये.
तालुक्याची एकूण लोकसंख्या १ लाख ९८ हजार २१८ असून, त्यापैकी अनुसूचित जातींची लोकसंख्या ३८ हजार ७७४ (१९.५६ टक्के) व अनुसूचित जमातींची लोकसंख्या १७ हजार ५८३ (८.८७ टक्के) आहे. या आधारे आठ गणांचे आरक्षण निश्चित करण्यात आले आहे.निमगाव खैरी गण (क्र. ५१) – सर्वसाधारण (जनरल)-या गणात ११ ग्रामपंचायतींचा समावेश असून लोकसंख्या २३,८०९ आहे.हा गण सर्वसाधारण वर्गासाठी राखीव ठेवण्यात आला आहे.उंदीरगाव गण (क्र. ५२) – अनुसूचित जाती- ८ ग्रामपंचायतींचा समावेश असलेल्या या गणाची लोकसंख्या २५,८५६ इतकी आहे.
टाकळीभान गण (क्र. ५३) – नागरिकांचा मागास प्रवर्ग महिला-या गणात ४ ग्रामपंचायती आहेत. लोकसंख्या २६,२२४ असून मागास प्रवर्गातील महिलेसाठी हा गण राखीव आहे.निपाणी-वडगाव गण (क्र. ५४) – सर्वसाधारण महिला-या गणाची लोकसंख्या २२,९१४ असून हा गण सर्वसाधारण महिलांसाठी राखीव करण्यात झाला आहे.दत्तनगर गण (क्र. ५५) – अनुसूचित जाती महिला-५ ग्रामपंचायती असलेल्या या गणात लोकसंख्या २४,२५३ आहे.अनुसूचित जातीतील महिलांना स्थानिक स्वराज्यात संधी देण्यासाठी हे आरक्षण निश्चित करण्यात आले आहे. हा तालुक्यातील सर्वाधिक अनुसूचित जाती लोकसंख्या असलेला गण ठरला आहे.उक्कलगाव गण (क्र. ५६) – नागरिकांचा मागास प्रवर्ग-८ ग्रामपंचायती व ९ गावे असलेल्या या गणात लोकसंख्या २४,०४६ असून हा गण मागास प्रवर्गासाठी राखीव ठेवण्यात आला आहे.
बेलापूर बु. गण (क्र. ५७) – सर्वसाधारण महिला-
३ ग्रामपंचायती व ५ गावे या गणात आहेत. लोकसंख्या २४,७४९ असून या भागात महिलांचे शैक्षणिक प्रमाण जास्त असल्याने निवडणुकीत महिला उमेदवारांमध्ये तीव्र चुरस अपेक्षित आहे.पढेगाव गण (क्र. ५८) – अनुसूचित जमाती-१० ग्रामपंचायती असलेल्या या गणाची लोकसंख्या २६,३६७ असून हा तालुक्यातील सर्वाधिक अनुसूचित जमाती लोकसंख्या असलेला गण आहे.
या वितरणावरून दोन गण अनुसूचित जातींसाठी, एक गण अनुसूचित जमातींसाठी, दोन गण मागास प्रवर्गासाठी आणि तीन गण सर्वसाधारण वर्गासाठी राखीव ठेवण्यात आले आहेत.श्रीरामपूर तालुक्यात जिल्हा परिषदेचे चार गट आहेत.या गटाचे आरक्षण पुढीलप्रमाणे-
दत्तनगर – अनुसूचित जाती पुरुष
उंदीरगाव – अनुसूचित जाती महिला,
बेलापूर – अनुसूचित जाती महिला,
टाकळीभान – सर्वसाधारण महिला.
या आरक्षणामुळे श्रीरामपूर तालुक्यातील ग्रामीण भागात राजकीय हालचालींना वेग येणार आहे. विविध पक्षांनी गणनिहाय उमेदवारांची छाननी सुरू केली असून, काही ठिकाणी स्थानिक गटबाजी डोके वर काढताना दिसणार आहे.दरम्यान, या घोषणेमुळे श्रीरामपूर तालुक्यातील निवडणूक वातावरण तापणार असून तालुक्यातील ग्रामीण भागाचे राजकारण चांगलेच ढवळून निघणार आहे.
