श्रीरामपूर-
श्रीरामपूर शहरात स्थानिक गुन्हे शाखेच्या पथकाने धडक कारवाई करत पुन्हा अवैधरित्या विकल्या जाणाऱ्या नशेच्या इंजेक्शसह मेडिकलच्या मालकास ताब्यात घेतले आहे.या इंजेक्शनच्या बाटल्या विकणाऱ्या मेडिकलवर धाड टाकत 31,370 रुपये किंमतीच्या नशेच्या इंजेक्शन व बाटल्या पोलिसांच्या पथकाने जप्त केल्या आहेत.या कारवाईत मेडिकलचा मालक पंकज राजकुमार चव्हाण वय 21, रा. खंडाळा,ता.श्रीरामपूर याला अटक करण्यात आली आहे.
याबाबत सविस्तर माहिती अशी की,स्थानिक गुन्हे शाखेच्या पथकाला मिळालेल्या गोपनीय माहितीच्या आधारे श्रीरामपूर शहर पोलीस ठाणे हद्दीतील खंडाळा परिसरात असणाऱ्या एका मेडिकलवर छापा टाकण्यात आला.कारवाईपूर्वी पथकाने औषध निरीक्षक सोमनाथ मुळे यांना सोबत घेतले. तपासणी दरम्यान पोलिसांनी एका बनावट ग्राहकाला मेडिकल मध्ये पाठवले होते. त्याला नशेच्या बाटल्या विकत असतानाच पथकाने मेडिकलचा मालक पंकज चव्हाण याला ताब्यात घेतले.त्यानंतर पथकाने मेडिकल आणि घराची झडती घेऊन 31,370 किंमतीच्या नशेचा साठा आणि रोख रक्कम जप्त केली आहे.या प्रकरणी स्थानिक गुन्हे शाखेचे पो.कॉ.रमीझ राजा रफीक आतार यांच्या फिर्यादीवरून श्रीरामपूर शहर पोलीस ठाण्यात गुन्हा रजि. क्र. 914/2025 भारतीय न्याय संहिता 2023 चे कलम 123, 125, 278 अन्वये गुन्हा दाखल करण्यात आला असून पुढील तपास श्रीरामपूर शहर पोलीस स्टेशन करीत आहे.ही कारवाई पोलीस अधीक्षक सोमनाथ घार्गे यांच्या मार्गदर्शनाखाली स्थानिक गुन्हे शाखेचे पो.नि.किरणकुमार कबाडी यांच्या सूचनेनुसार पोउपनि दिपक मेढे,अंमलदार विजय पवार, राहुल द्वारके,रिचर्ड गायकवाड, सुनिल मालणकर,रमीझराज आतार,चंद्रकांत कुसळकर यांच्या पथकाने केली.
