श्रीरामपूर-
श्रीरामपूर पंचायत समितीचे सभापतीपद हे सर्वसाधारण वर्गासाठी खुले झाले आहे.नगरपरिषद पाठोपाठ आता पंचायत समितीचे सभापती पदही खुले झाल्याने सर्वच पक्षाच्या नेते मंडळींच्या प्रमुख कार्यकर्त्यांच्या अपेक्षा उंचावल्या आहेत.त्यामुळे तालुक्यावरील वर्चस्व सिध्द करण्यासाठी सभापतीपदाच्या निवडणुकीत इच्छुकांची भाऊगर्दी होणार आहे.
काल मंगळवार दि. 7 ऑक्टोबर रोजी जिल्हाधिकारी कार्यालय येथे पंचायत समिती सभापतीपदासाठी आरक्षण सोडत पार पडली. यामध्ये श्रीरामपूर पंचायत समितीचे सभापतीपद खुले झाले आहे. २०१६ नंतर हे पद खुल्या प्रवर्गासाठी आरक्षित झाल्याने प्रस्थापितांची प्रतिक्षा संपली आहे.सभापतीपद २०१६ ला सर्वसाधारण खुले, २०१८ ला ओबीसी (महिला) साठी आरक्षित झाले होते.आता सर्व आरक्षणे नव्याने काढण्याचा निर्णय झाल्याने हे पद खुले झाले आहे.सभापतीपदासाठी पालकमंत्री ना.राधाकृष्ण विखे पा.यांचे कट्टर समर्थक माजी सभापती दीपक पटारे, काँग्रेसकडून सचिन गुजर,राष्ट्रवादीचे प्रदेश सरचिटणीस अरुण नाईक, बाजार समितीचे उपसभापती अभिषेक खंडागळे,मा. सभापती वंदना मुरकुटे यांच्यासह अनेकजण उत्सुक आहेत.२०१६ मध्ये झालेल्या पंचायत समितीच्या निवडणूकित अटीतटीच्या झालेल्या लढतीत काँग्रेसचे चार तर विकास आघाडीचे चार सदस्य निवडून आले होते. त्यामुळे सभापती व उपसभापती पद हे अडीच-अडीच वर्षासाठी वाटून घेण्यात आले होते.आता राजकीय परिस्थिती पूर्ण बदलली आहे.आता पालकमंत्री विखे पा. यांच्या नेतृत्वाखाली भाजप स्वबळावर निवडणुकीच्या रिंगणात उतरणार आहे.काँग्रेस आ. हेमंत ओगले व करण ससाणे,शिवसेना मा. आ. भानुदास मुरकुटे तर राष्ट्रवादी अविनाश आदिक व मा. आ. लहुजी कानडे यांच्या नेतृत्वाखाली निवडणूक रिंगणात उतरेल असे सध्याचे चित्र आहे.दरम्यान सोमवारी निघणार्या जि.प. गट व पंचायत समिती गण आरक्षण सोडतीकडेही तालुक्याचे लक्ष लागलेले आहे. या आरक्षण सोडतीनंतरच पंचायत समिती निवडणूकीचे खरे चित्र स्पष्ट होणार आहे.
