श्रीरामपूर-
माहितीच्या अधिकाराचा वापर करून प्राथमिक आरोग्य केंद्रातील माहिती मागवून घेऊन तेथील डॉक्टरलाच ब्लॅकमेल करत पैसे उकळणाऱ्याच्याविरोधात श्रीरामपूर शहर पोलिस ठाण्यात खंडणीचा गुन्हा दाखल करण्यात आला आहे.शहरातील एजाज कलींदर पठाण, वय-२७,रा.वॉर्ड नं.१,आर.बी.एन.बी. कॉलेजजवळ असे आरोपीचे नाव आहे.याबाबत डॉक्टर रामदास बाबासाहेब बोरूडे, वय ४०, रा. बेलापूर रोड, वॉर्ड नं.७,बोंबलेनगर, हल्ली नोकरी टाकळीभान प्राथमिक आरोग्य केंद्र यांनी दिलेल्या फिर्यादीत म्हटले आहे की, श्रीरामपूर शहरातील पठाणवस्ती, वॉर्ड नं.१, आर.बी.एन.बी. कॉलेजच्या पाठीमागे राहणारा एजाज कलींदर पठाण, वय-२७
याने टाकळीभानच्या आरोग्य केंद्रात येवून मी छावा ब्रिगेडचा अध्यक्ष, जिल्हा संपर्क प्रमुख आरटीआय कार्यकर्ता असल्याचे सांगत माहिती अधिकाराच्या अर्जाद्वारे रूग्णालयातील बिले, कॅशबुक, बँक स्टेटमेंट यांच्या प्रती मागवल्या. त्यांना आपण सदरची माहिती पुरवली. त्यानंतर त्याने त्याच्यासोबत जमिला पठाण, त्याचा प्रतिनिधी विनायक जाधव यांच्या नावाने एकूण ७ अर्ज दिले. तसेच विविध मुद्देनिहाय माहिती मागवली. आमच्यासह तालुक्यातील पढेगाव, बेलापूर,
माळवाडगाव व श्रीरामपूर नगरपरिषद आरोग्य केंद्र श्रीरामपूर यांनाही माहिती मागितल्याचे डॉक्टरांकडून मला समजले. माहिती देण्याची प्रक्रिया चालू असताना एजाज पठाण याने आपल्याला फोन करून प्रकरण मिटवण्यासाठी ३० हजार रुपये मागितले. आपण घाबरून २२ हजार रूपये त्याला पाठवले. त्यानंतर एजाज पठाण व विलास ढोकणे नावाने मला तसेच तालुक्यातील प्राथमिक आरोग्य केंद्रातील इतर ९ वैद्यकीय अधिकारी,अकौंटंट यांच्याविरूद्ध मंत्रालय व इतर १२ ठिकाणी लेखी तक्रार अर्ज केले. त्याबाबत तालुका आरोग्य अधिकारी डॉ. मोहन शिंदे यांनी आमचा खुलासाही घेतला. त्यात आमचा दोष नसल्याचे सांगितले. त्यानंतर पठाण याने माझ्या व इतर ३ वैद्यकीय अधिकाऱ्यांविरूद्ध वरीष्ठ कार्यालयात अर्ज सादर केला. त्यानंतर एजाज पठाण याने आपल्या मोबाईलवर फोन करून प्रकरण मिटवायला बोलावले. तेथे १ लाखाची मागणी केली व सगळ्या डॉक्टरांना बोलवा, बैठक घ्या, किती द्यायचे ते ठरवा, नाहीतर सर्व डॉक्टरांवर गुन्हे दाखल होतील, तुम्हाला जेलमध्ये बसावे लागेल, अशी धमकी दिली. अशाच प्रकारे पढेगाव आरोग्य केंद्राचे डॉक्टर यांना देखील धमकी दिल्याचे आपल्याला समजले असे फिर्यादीत म्हटले आहे. सदर फिर्यादीवरून पोलिसानी एजाज कलींदर पठाण याच्याविरूद्ध शहर पोलिसात गुन्हा दाखल केला आहे. पुढील तपास पो.नि.नितीन देशमुख यांच्या मार्गदर्शनाखाली शहर पोलीस करीत आहेत.
