श्रीरामपूर-
राज्य उत्पादन शुल्क भरारी पथक क्र.२ ने शहरातील भगतसिंग चौकाजवळील घास गल्लीतील वाईन सेंटर या दारूच्या दुकानाजवळ देशी-विदेशी दारूसह तिघांना ताब्यात घेतले असून त्यांच्याकडून सुमारे २ लाख ४४ हजार ३४५ रुपयांचा मुद्देमाल जप्त करण्यात आला.विशेष म्हणजे कारवाई करण्यात आलेल्या दोन दारूच्या दुकांनांपैकी एक दारूचे दुकान हे माजी नगरसेवकाच्या मालकीचे असल्याची माहिती समोर आली आहे.महात्मा गांधी जयंती व विजयादशमीमुळे सगळीकडे ड्राय डे आहे. मात्र अनेक ठिकाणी लपून-छपून दारूची विक्री सुरू आहे. याबाबत राज्य उत्पादन शुल्क विभागाने शहरातील घासगल्ली येथील वाईन सेंटर या दारूच्या दुकानाजवळ देशी व विदेशी दारू विकताना तिघांना ताब्यात घेतले असून त्यांच्याजवळ देशी दारूचे १४ बॉक्स, विदेशी दारूचे २ बॉक्स, बिअर २ बॉक्स व टाटा मॅजिक टेम्पो असा सुमारे २ लाख ४४ हजार ३४५ रुपयांचा मुद्देमाल जप्त करण्यात आला आहे. ही कारवाई दारू उत्पादन शुल्क चे निरीक्षक अनुपकुमार देशमाने यांच्या नेतृत्वाखाली दुय्यम निरीक्षक संदीप मांडवेकर, जवान सचिन बटुळे, यु. डी. काळे, महिला जवान आर. ए. काळा पहाड व चालक दुर्गेश गायकवाड यांनी केली. यामध्ये किशोर भुक्तर, अनिल भुक्तर,अक्षय काळे या तिघांना ताब्यात घेतले असून पुढील तपास सुरू आहे.
