श्रीरामपूर-
आमदार हेमंत ओगले यांच्या प्रयत्नाला यश आले असून महावितरणाच्या श्रीरामपूर ग्रामीण कार्यालयाचे विभाजन होऊन नव्याने बेलापूर ग्रामीण उपविभाग निर्माण करण्यास राज्य शासनाने मंजुरी दिली आहे.
विधानसभा निवडणुकीच्या निकालानंतर आमदार होताच आ.ओगले यांनी श्रीरामपूर महावितरण कार्यालयाचे विभाजन करावे यासाठी राज्याचे मुख्यमंत्री तथा ऊर्जामंत्री देवेंद्र फडणवीस तसेच ऊर्जा राज्यमंत्री मेघनाताई बोर्डीकर आणि महावितरणचे व्यवस्थापकीय संचालक यांच्याकडे वेळोवेळी समक्ष भेटी घेऊन महावितरण कार्यालयाचे विभाजन करणे करिता प्रयत्न केले होते.सदर प्रयत्नास यश आले आहे.श्रीरामपूर- राहुरी विधानसभा मतदारसंघ हा क्षेत्रफळाच्या दृष्टीने मोठा असून महावितरणाच्या श्रीरामपूर कार्यालयावर अधिकचा भार येत होता त्याचा परिणाम विशेषता ग्रामीण भागासह औद्योगिक विकासावर होत होता. हीच बाब लक्षात घेऊन आमदार ओगले यांनी श्रीरामपूर महावितरण कार्यालयाच्या विभागणीची मागणी शासन दरबारी केली होती. नव्याने झालेल्या बेलापूर ग्रामीण उपविभाग कार्यालयाला 12 नवीन पदांची निर्मिती करण्यात आली असून त्याच्या वित्तीय खर्चास देखील शासनाने मान्यता दिली आहे.आता श्रीरामपूर ग्रामीण उपविभागाच्या आस्थापनेवर श्रीरामपूर एमआयडीसी शाखा, श्रीरामपूर ग्रामीण शाखा, व सूतगिरणी शाखा आणि नव्याने मंजूर झालेल्या बेलापूर ग्रामीण उपविभागाच्या आस्थापनेवर बेलापूर ग्रामीण शाखा, हरेगाव ग्रामीण शाखा आणि टाकळीभान ग्रामीण शाखा आशा कार्यालय ठेवण्यात आले आहे. या कार्यालयाच्या विभाजनामुळे मतदारसंघातील शेतकरी व ग्राहकांना वीज पुरवठा सुरळीत होण्यास नक्कीच मदत होणार असल्याचे देखील आमदार हेमंत ओगले यांनी म्हटले आहे.
आ.ओगले यांच्या पाठपुराव्यातून विजेच्या बाबतीत मतदारसंघ स्वयंपूर्ण होणार असून गेल्या काही दिवसांपूर्वीच 220 के.व्ही सब स्टेशनच्या कामाच्या शुभारंभ होऊन कामास देखील प्रारंभ झाला आहे तसेच आता श्रीरामपूर वीज केंद्राचे विभाजन होऊन नव्याने बेलापूर उपकेंद्रास मंजुरी मिळाल्याने याचा विज ग्राहकांना फायदा होणार आहे.
