श्रीरामपूर-
पहलगाम मधील अतिरेकी हल्ल्यानंतर आपल्या भारतीय सैन्य जवानांनी एकत्रित रित्या मोहीम राबवून पाकव्याप्त काश्मीरमधील दहशतवादी स्थळ उध्वस्त केली. यात असंख्य अतिरेक्यांना यमसदनी पाठवण्याचे अतुलनीय शौर्य आपल्या सैन्याने दाखवले. अत्यंत जोखमीच्या या मोहिमेला ‘ऑपरेशन सिंदूर’ संबोधले गेले.याच ऑपरेशन सिंदूरमध्ये श्रीरामपूरचे भुमीपूत्र पायलट देवेंद्र बाबासाहेब औताडे यांना वायूसेना पदक (शौर्य) प्रदान करण्यात आले आहे.अनेकांनी याबद्दल कौतुक करत त्यांचे अभिनंदन केले आहे.फायटर पायलट असलेले देवेंद्र औताडे हे गणेश कारखान्याचे माजी कार्यकारी संचालक बाबासाहेब दगडू औताडे यांचे चिरंजीव असून शेतकरी संघटनेचे सुदाम औताडे यांचे ते पुतणे आहेत.ऑपरेशन सिंदूरमध्ये हवाई दलाचे फायटर पायलट म्हणून उच्च जोखमीच्या मोहिमेत देवेंद्र औताडे यांनी जे अपार शौर्य दाखवले त्यासाठी त्यांना हे शौर्यपदक देण्यात आले आहे. श्रीरामपूर तालुक्यातील माळेवाडी येथील शेतकरी कुटूंबात जन्माला आलेल्या देवेंद्र औताडे यांनी जे शौर्य दाखवले, त्याबद्दल श्रीरामपूर तालुक्यासह अहिल्यानगर जिल्हयातुन त्यांचे अभिनंदन केले जात आहे.
