श्रीरामपूर-
श्रीरामपूर नगरपालिका निवडणूकीमुळे शहरात ऐन थंडीच्या दिवसात राजकीय वातावरण कमालीचे तापले आहे.शहरात कट्टयाकट्टयावर सध्या फक्त निवडणूकीची चर्चा रंगत आहे.त्यातच आता श्रीरामपुरात निघालेल्या एका उमेदवाराच्या रॅलीमध्ये रोजंदारीवर ‘कार्यकर्ते’ आणल्याचा व्हिडीओ संबंधित उमेदवाराच्या विरोधकांकडून व्हायरल केला गेल्याने या व्हिडीओची शहरात जोरदार चर्चा सुरू आहे.त्याचे झाले असे की,श्रीरामपूर शहरात एका
उमेदवाराची भव्य दिव्य रॅली निघाली. या रॅलीची शहरात जोरदार चर्चा सुरू असतानाच सोशल मीडियावर या रॅलीबाबतचा एक व्हिडीओ व्हायरल झाला आहे. त्यात एक व्यक्ती आपल्याला रॅलीत येण्यासाठी २०० रूपये रोजंदारी दिल्याचे सांगत आहे. त्या व्हिडीओत संबंधित उमेदवाराचे नावही ही व्यक्ती घेत असून मध्यस्थाचेही नाव सदर व्यक्ती घेत आहे. एका जणाने ३०० रूपये देऊन ४०० लोकांना रॅलीत आणल्याचे हा व्यक्ती सांगत आहे. सदर व्हायरल व्हिडीओमधील व्यक्ती हा मद्यपी असल्याचेही दिसते. सदर रॅलीचा व्हिडीओ आणि त्याबरोबर या रोजंदारी दिल्याचे सांगणाऱ्या व्यक्तीचा व्हिडीओ व्हायरल करण्यात आल्याने मोठी खळबळ उडाली आहे. दरम्यान आता कुठे नगरपालिका निवडणूक प्रचाराला सुरुवात झाली आहे.सुरवातीच्या टप्प्यातच इच्छुक उमेदवार आणि त्याच्या विरोधकांनी एकमेकांना कोंडीत पकडण्यासाठी असे हातखंडे वापरायला सुरुवात केल्याने निवडणूक येणाऱ्या काळात कुठल्या वळणावर जाईल,हे पाहणे उत्सुकतेचे ठरणार आहे.
