श्रीरामपूर-
श्रीरामपूर शहरातील वॉर्ड नं. ०२ मध्ये औषध फवारणीसाठी गेलेल्या कंत्राटी कामगाराला गचांडून मारहाण करण्याचा प्रकार घडला असून १५ दिवसातील हा दुसरा प्रकार आहे.राहुल सखाराम चव्हाण, वय-२०, धंदा-मजूरी याने पोलिसात फिर्याद दिली असून त्यात म्हटले आहे की, मी एव्हरग्रिन पेस्ट कंट्रोल या कंपनीकडे औषध फवारणीचे काम करतो. आमच्या कंपनीस श्रीरामपूर नगरपालिकेने शहरात औषध फवारण्याचा ठेका दिला असून पालिका जेथे सांगेल तेथे शहरात औषध फवारणीचे काम आम्ही करतो.०८ एप्रिल रोजी दुपारी २ च्या सुमारास मी, माझ्यासोबत काम करणारे ट्रॅक्टर ड्रायव्हर सोहन राजू मोरे, आकाश नारायण भुसे असे आम्ही नेमून दिलेल्या ठिकाणी वॉर्ड नं. २ मध्ये ट्रॅक्टरद्वारे फवारणी करत असताना वारे सुटल्याने काही द्रव मेहमूद पटेल यांच्या घरात गेल्याच्या कारणावरून ते शिव्या देत घराबाहेर आले. तेव्हा आपण वाऱ्यामुळे चुकून द्रव तुमच्या घरात आला असावा असे म्हणत आपण त्यांची माफी मागितली.मात्र त्यावर मेहमूद पटेल हा धावत अंगावर आला व माझी गचांडी धरून लाथाबुक्क्यांनी मारहाण केली. त्यावेळी एका अनोळखी इसमाने मला मागून धरले. त्यानंतर पटेल याने जवळ पडलेली काठी घेवून आपल्या पाठीवर, हातावर मारली. माझ्याबरोबर असलेला आकाश भुसे हा त्यांना समजून सांगत असताना त्या दोघांनी आकाश यालाही वाईट वाईट शिवीगाळ करून धक्काबुक्की केली, असे फिर्यादीत राहुल चव्हाण याने म्हटले आहे.सदर फिर्यादीवरून मेहमूद पटेल (पुर्ण नाव माहीत नाही), रा. वॉर्ड नं. २ व एक अनोळखी इसम यांच्याविरूद्ध श्रीरामपूर शहर पोलिसात गुन्हा दाखल करण्यात आला आहे. पुढील तपास पोनि.नितीन देशमुख यांच्या मार्गदर्शनाखाली श्रीरामपूर शहर पोलीस करीत आहेत.
