श्रीरामपूर-
राहता येथील तरुणाचा अनैतिक संबंधाच्या व आर्थीक व्यवहाराच्या कारणावरुन खुन करण्यात आल्याचे पोलिसांच्या तपासात उघड झाले आहे.स्थानिक गुन्हे शाखेच्या पथकाने याप्रकरणी दोन आरोपींना अटक केली असून एक आरोपी हा रेकॉर्ड वरील गुन्हेगार आहे.
याबाबत सविस्तर माहिती अशी की,
अपहरण झालेला सचिन कल्याणराव गिधे याच्याबाबत स्थानिक गुन्हे शाखेच्या पथकाने सखोल तपास केला असता आरोपी दिपक अंबादास पोकळे याने त्याचे साथीदार गणेश गोरखनाथ दरेकर,प्रविण उर्फ पचास वाघमारे,कृष्णा संतोष वाघमारे यांचेसह सचिन गिधे याचा अनैतिक संबंधाच्या व आर्थीक व्यवहाराच्या कारणावरुन खुन करुन त्याचा मृतदेह टायर व डिझेलच्या सहाय्याने जाळून टाकला असल्याचे पोलिसांना सांगितले. पोलिसांनी आरोपींच्या ताब्यातुन मृतदेहाची विल्हेवाट लावण्याकरीता वापरण्यात आलेली १५,००,००० रुपये किमतीची विनानंबरची स्कॉर्पीओ गाडी, ७२,००० रुपये किमतीचे ०३ मोबाईल फोन असा एकुण १५,७२,००० रुपये किमतीचा मुद्देमाल जप्त केला आहे.
आरोपी दिपक अंबादास पोकळे, वय ३४ वर्षे, रा. लोहारे, ता. संगमनेर, जि. अहिल्यानगर हा रेकॉर्डवरील गुन्हेगार असुन त्याची शिर्डी, राहाता, लोणी, संगमनेर, कोपरगाव परिसरामध्ये त्याची दहशत आहे. त्याच्याविरुध्द मोक्का, खुन, खुनाचा प्रयत्न, दरोडा, दरोडा तयारी, जबरी चोरी अशा प्रकारे गंभीर स्वरुपाचे १७ गुन्हे दाखल आहेत.
१०/१२/२०२५ रोजी सचिन कल्याणराव गिधे रा. हॉलीडे पार्क शेजारी शिर्डी, ता. राहाता, जि.अहिल्यानगर हा साई सुनिता हॉटेल शिर्डी या ठिकाणी गेला होता. त्या दरम्यान फिर्यादी श्रध्दा गिधे हिस आरोपी प्रविण वाघमारे याने फोन करुन ‘सचिन लई माजला आहे, त्याचे हातपाय काढावे लागतील’ अशी धमकी दिली. सचिन गिधे हा परत घरी न आल्याने फिर्यादी श्रध्दा सचिन गिधे हिने दिनांक १५/१२/२०२५ रोजी दिलेल्या फिर्यादीवरुन राहाता पोलीस ठाणे येथे गु.र.नं. ४५४/२०२५ भारतीय न्याय संहिता २०२३ चे कलम १३७ (२) प्रमाणे आरोपी प्रविण उर्फ पचास वाघमारे, दिपक अंबादास पोकळे यांचेविरुध्द गुन्हा दाखल करण्यात आला आहे.
तसेच दिनांक १०/१२/२०२५ रोजी गौतम कैलास निकाळे वय २५ वर्षे, रा. राहाता, ता. राहाता, हल्ली रा. सौंदडीबाबा चौक, कालीकानगर, शिर्डी, ता. राहाता जि. अहिल्यानगर यास आरोपी प्रविण वाघमारे उर्फ पचास व त्याचा साथीदार अशांनी त्याच्या घरी जावुन त्यास साकुरी शिव या ठिकाणी जावुन येवु असे म्हणुन त्यास मोटारसायकलवर बसवून नेले. उपासणे बाबा मंदीराच्या पाठीमागे साकुरी, ता. राहाता या ठिकाणी नेवुन त्यास आरोपी प्रविण वाघमारे व त्याचे इतर साथीदारांनी लाथाबुक्क्या व दगडाने मारहाण केली. सदर घटनेबाबत शिर्डी पोलीस ठाणे येथे गु.र.नं. १०२७/२०२५ भारतीय न्याय संहिता २०२३ चे कलम ११८ (२), ११८(१), ११५ (२), ३५२, ३५१ (२), ३ (५) प्रमाणे गुन्हा दाखल आहे.
आरोपी प्रविण वाघमारे याने व त्याच्या साथीदारांनी एकाच दिवशी दोन गुन्हे केले आहेत.
स्थानिक गुन्हे शाखेचे पोलीस निरीक्षक किरणकुमार कबाडी यांच्या नेतृत्वाखाली पोउपनि/दिपक मेढे, पोलीस अंमलदार विजय पवार, फुरकान शेख, दिपक घाटकर, राहुल द्वारके, भिमराज खर्से, राहुल डोके, सुनिल मालणकर, सतिष भवर, प्रशांत राठोड, प्रमोद जाधव, महादेव भांड, भगवान धुळे, महिला पोलीस अंमलदार सोनल भागवत यांच्या पथकाने घटना ठिकाणी भेट देवून सलग १५ दिवस आरोपीची माहिती काढली.सदर गुन्ह्यातील आरोपी दिपक अंबादास पोकळे हा सतत त्याचे राहण्याचे ठिकाणे बदलत असल्याने पथकाने पुणे, नाशिक, खारघर मुंबई, छ. संभाजीनगर, मालेगाव परिसरामध्ये जावुन सदर आरोपी व त्याचे इतर साथीदारांची माहिती काढली. दिनांक ०६/०१/२०२५ रोजी दिपक पोकळे हा त्याच्या साथीदारासह मेंढवण शिवार, संगमनेर परिसरातील दगडाचे खाणीमध्ये लपुन बसलेला असल्याची पथकास गुप्त माहिती प्राप्त झाल्याने पथकाने तात्काळ मेंढवण या ठिकाणी जावुन तेथील दगडाचे दगडाचे खाणीस चोहोबाजुनी वेढा घालुन सदर आरोपींना ताब्यात घेवुन त्यांच्याकडे चौकशी केली असता त्यांनी त्यांची नावे दिपक अंबादास पोकळे वय ३४ वर्षे, रा. लोहारे, ता. संगमनेर, जि. अहिल्यानगर, गणेश गोरखनाथ दरेकर वय २१ वर्षे, रा. पिंपळगाव जलाल, ता. येवला, जि. नाशिक अशी असल्याचे सांगितले. पोलिसांनी दोघांनाही अटक केली आहे.
