श्रीरामपूर-
शिर्डी शहरातील लक्ष्मीनगर भागात रविवारी मध्यरात्री अज्ञात व्यक्तीने मा. खा. डॉ. सुजय विखे यांच्या बॅनरची तोडफोड केली.शिर्डी हा विखे पाटलांचा बालेकिल्ला असल्याने त्याच ठिकाणी सुजय विखे यांचा बॅनर फाडला जाण्याची ही घटना धक्कादायक मानली जात आहे. दरम्यान या घटनेने विखे पाटील यांच्या समर्थकांनी संताप व्यक्त करत पोलिसांनी तात्काळ आरोपींना शोधून काढण्याची मागणी लावून धरली आहे. या अज्ञात आरोपीनी फक्त बॅनरचीच नव्हे तर परिसरात उभ्या असलेल्या काही दुचाकींचीही तोडफोड केली आहे. या घटनेमुळे स्थानिकांमध्ये भीतीचे वातावरण निर्माण झाले असून विखे समर्थकांमध्ये तीव्र नाराजी आहे. घटनेची माहिती मिळताच मा. खा. डॉ. सुजय विखे समर्थक मोठ्या संख्येने शिर्डी पोलिस ठाण्यात धाव घेतली. समर्थकांनी पोलिसांकडे तक्रार दाखल करत दोषींवर कठोर कारवाईची मागणी केली. शिर्डी पोलिसांनी तत्काळ घटनास्थळी भेट देऊन पाहणी केली असून गुन्हा दाखल करण्याची प्रक्रिया सुरू केली आहे.पोलिसांनी परिसरातील सीसीटीव्ही फुटेज तपासण्यास सुरुवात केली असून घटनेचा शोध शिर्डी पोलिस घेत आहेत.
पोलिस तपासात काय निष्पन्न होते याकडे सगळ्यांचे लक्ष लागले आहे.या घटनेवर मा. खा. सुजय विखे पाटील यांनीही प्रतिक्रिया दिली असून ते म्हणाले की, मतदारसंघातील वाढत्या गुन्हेगारीच्या विरोधात आपण खमकी भूमिका घेतली आहे. त्यामुळे अनेक गुन्हेगारी प्रवृत्तीच्या लोकांच्या अडचणी वाढल्या आहेत. या पुढिल काळातही त्यांच्या विरोधात आणखी तीव्र कारवाई करण्यात येणार असून मतदारसंघातील जनतेच्या सुरक्षेसाठी आवश्यक ती सर्व पावले उचलली जाणार आहेत. तसेच या अशा घटनांना मी फार महत्व देत नसल्याचेही त्यांनी शेवटी सांगितले.
