श्रीरामपूर-
श्रीरामपूर नगरपालिकेच्या प्रवेशद्वारावर आज एक वेगळ्या प्रकारची अस्वस्थता होती.नेहमी आंदोलने,मोर्चे आणि घोषणांनी घेरलेल्या नगरपालिकेसमोर भारतरत्न डॉक्टर बाबासाहेब आंबेडकर यांच्या पूर्णाकृती पुतळ्यासाठी एका आंबेडकरी चळवळीतील कार्यकर्त्याने आपल्याच देहाची ‘होळी’ करण्याचा निर्धार केलेला होता. त्यामुळे वातावरण गंभीर आणि तितकेच चिंतेचे होते. आंदोलक घोषणा देत होते,कार्यकर्त्यांच्या भावनांचा कल्लोळ उसळलेला होता. याच ताणतणावाच्या गर्दीत एक पोलीस कॉन्स्टेबल आपल्या समयसूचकतेने ‘त्या’ आत्मदहन करणाऱ्या कार्यकर्त्याचा जीव वाचवतो अन आपसूकच उपस्थितांना खाकीतला देवदूत त्याच्यात दिसून जातो.याबाबतचे सविस्तर वृत्त असे की,आंबेडकर चळवळीतील मनोज काळे हे डॉ.बाबासाहेबांचे पूर्णाकृती स्मारकासाठी गेल्या कित्येक दिवसांपासून प्रशासनाला निवेदने देत आहेत. तरी देखील न्याय मिळत नसल्याने, आपल्या मागणीसाठी आज त्यांनी अखेर नगरपालिकेसमोर आत्मदहन करण्याचा मार्ग निवडला.आंदोलन सुरू असताना श्रीरामपूर नागरपरिषदेच्या मागच्या बाजूने जेव्हा ते स्वतःला आगीच्या हवाली करण्याच्या प्रयत्नात होते, तेव्हा एका पोलीस कर्मचाऱ्याच्या सतर्क नजरने त्यांना हेरले. ती सतर्क नजर होती श्रीरामपूर शहर ठाण्याचे पोलीस कॉन्स्टेबल सचिन दुकळे यांची.आज त्यांची साप्ताहिक सुट्टी होती तरी आपल्या कर्तव्याप्रती असलेली जबाबदारीने त्यांना स्वस्थ बसू दिले नाही.अखेर त्यांनी आत्मदहनाचा प्रयत्न करणाऱ्या काळे यांच्यावर
क्षणार्धात झडप घातली आणि त्यांना घट्ट जखडून ठेवले. एका क्षणासाठी सारे वातावरण स्तब्ध झाले. त्यानंतर पोलीस निरीक्षक नितीन देशमुख यांच्यासह समाधान सोळंके, आजीनाथ आंधळे आणि महिला पोलीस कॉन्स्टेबल मिरा सरग यांनी तात्काळ घटनास्थळी धाव घेतली.आंदोलक काळे यांना सुरक्षितपणे ताब्यात घेतले गेले.पोलीस कॉन्स्टेबल सचिन दुकळे यांनी तत्परता आणि सतर्कता दाखवून अघटित घटना घडण्यापासून थांबवली. त्यांच्या समयसूचक कृतीमुळे मनोज काळे यांचे प्राण वाचले. म्हणूनच ते आज केवळ पोलीस दलाचेच नव्हे, तर संपूर्ण श्रीरामपूर शहराचे हीरो ठरले आहेत.खाकी वर्दीतल्या देवदूताला सलाम!
