श्रीरामपूर-
घरात स्वयंपाक करत असलेल्या
महिलेच्या गळ्याला चाकू लावत तिला खाली पाडून तिच्या गळ्यातील दागिने काढून घेत चोरट्यांनी पोबारा केल्याची घटना वळदगाव, ता.श्रीरामपूर येथे घडली आहे.
घरात घुसून तिघा जनांनी केलेल्या या जबरी चोरीच्या घटनेने परिसरात एकच खळबळ उडाली आहे. या घटनेत चोरट्यांनी सव्वातीन लाखाचे दागिने व रोख रक्कम चोरी केली आहे.याबाबत श्रीरामपूर शहर पोलीसात तीन जणां विरोधात गुन्हा दाखल करण्यात आला आहे.
याबाबतची अधिक माहिती अशी की, मेघा गोरख नवगिरे या पती ,मुलगी व मुलगा यांच्या समवेत वळदगाव येथील गोपाळ वस्ती येथे राहतात. काल शुक्रवार दि. २२ मे रोजी रात्री सव्वा आठच्या सुमारास मेधा नवगिरे ह्या स्वयंपाक करत होत्या व मुलगा हा जेवण करत होता. तेव्हा अचानक घराच्या मागच्या दाराने एक अनोळखी इसम घरात घुसला.त्याच्या अंगात टि-शर्ट आणि काळ्या रंगाची पॅन्ट व तोंडाला मास्क लावलेले होते. त्याने घरात येताच नवगिरे यांच्या गळ्याला चाकू लावला व त्यांना खाली पाडून गळ्यातील सोन्याची पोत चाकूने तोडून घेतली. त्यानंतर आणखी दोन इसम अंगात काळ्या रंगाचे टि-शर्ट,काळ्या रंगाच्या पॅन्टी व तोंडाला काळे लावलेले घरात घुसले त्यांनी हत्याराचा धाक दाखवून घरातील सोने, दागिने काढून दे अन्यथा जीवे ठार मारून टाकू अशी धमकी दिली.त्यानंतर घरातील कपाट व सामानाची उचकापाचक करून दागिने व रोख रक्कम चोरून पलायन केले.रात्री ८ वाजेच्या सुमारास घडलेल्या या चोरीच्या घटनेने परिसरात मोठी घबराट पसरली आहे.
