श्रीरामपूर-
श्रीरामपूर नगरपालिका निवडणुकीसाठी महाआघाडीच्या वतीने काँग्रेसचे माजी उपनगराध्यक्ष करण ससाणे यांनी नगराध्यक्ष पदासाठी उमेदवारी अर्ज दाखल केला आहे, अशी माहीती निवडणूक निर्णय अधिकारी किरण सावंत पाटील यांनी दिली.दरम्यान उबाठा शिवसेनेकडून स्वबळावर नगरपालिका निवडणूक लढवण्याची घोषणा करण्यात आल्याने नगराध्यक्षपदासाठी ससाणे यांच्यापुढे महाविकास आघाडीतूनच आव्हान निर्माण झाले आहे. त्यावर काँग्रेस व करण ससाणे कशी मात करतात हे पाहणे उत्सुकतेचे ठरणार आहे.
एकीकडे आघाडीच्या वतीने काँग्रेसने ससाणे यांचा उमेदवारी अर्ज दाखल केला असला तरी महायुतीचा नगराध्यक्ष पदाचा उमेदवार अजूनही ठरताना दिसत नाही. अर्ज दाखल करण्यास अवघे 2 दिवस उरलेले असताना महायुतीचे चर्चेचे गुऱ्हाळ अद्यापही सुरूच आहे.आज रात्री किंवा उद्यापर्यंत महायुतीच्या नगराध्यक्षपदाच्या उमेदवाराची घोषणा होणे अपेक्षित असून त्या दृष्टीने पालकमंत्री राधाकृष्ण विखे पाटील यांची शिवसेना व राष्ट्रवादी काँग्रेसच्या वरिष्ठ नेत्यांशी चर्चा झाली आहे.शिवसेनेच्या धनुष्यबाण चिन्हावर नगराध्यक्ष पदाची निवडणूक लढवली जावी असा आग्रह होत असल्याचे समजते.श्रीरामपूरसह राज्यातील इतर चार नगरपालिकाबाबत उपमुख्यमंत्री एकनाथ शिंदे हे निर्णय घेणार असल्याची चर्चा आहे.
तसेच राष्ट्रवादी काँग्रेसच्या वतीनेही नगराध्यक्षपदावर दावा केला जात असून उपमुख्यमंत्री अजित पवार हे त्यासाठी आग्रही आहेत,अशी माहिती मिळाली आहे.माजी नगराध्यक्षा अनुराधा आदिक ह्या निवडणूक लढवण्यास इच्छुक आहेत.शिवसेना-भाजप-राष्ट्रवादी सर्वांनी नगराध्यक्ष पदावर दावा कायम ठेवल्याने नगराध्यक्षपदाचा उमेदवार जाहीर करण्यास विलंब होत आहे. उमेदवार जाहीर झाल्यानंतर बंडोबांना थंड करण्याचे आव्हानही महायुतीपुढे असणार आहे.श्रीरामपूरात आघाडी व युती होते किंवा नाही याबाबत अद्यापही चित्र स्पष्ट झालेले नाही. मात्र, आपल्यालाच उमेदवारी मिळणार आविर्भावात अनेकांनी आपला प्रचार सुरू केला आहे.काहीजण नगराध्यक्षपदासाठी अपक्षही लढू शकतात, असा कयास बांधला जात आहे.
