श्रीरामपूर-
श्रीरामपूर तालुक्यातील ऐनतपूर, वीरभद्रेश्वर मंदिर शेजारील नवले वस्ती येथे आज (रविवार, दि. २१ सप्टेंबर) पहाटे साडेतीनच्या सुमारास चंदन चोरीची धक्कादायक घटना घडली. ज्येष्ठ पत्रकार सुनील नवले यांच्या घरासमोरचे तब्बल १० ते १५ हजार रुपये किंमतीचे चंदनाचे झाड अज्ञात चोरट्यांनी तोडून नेले.
लहानपणापासून काळजीपूर्वक वाढवलेले हे झाड एकाच रात्रीत नाहीसे झाल्याने नवले कुटुंब हतबल झाले आहे. गजबजलेल्या वस्तीमध्येच झाड कापून नेल्याने चोरट्यांनी बेलापूर पोलिसांना थेट आव्हान दिल्याचीच चर्चा रंगत आहे.घटनेच्या वेळी झाडाशेजारील खोलीत झोपलेले नवले यांचे चुलतबंधू झाड पडल्याचा आवाज येताच खिडकीतून बाहेर डोकावले. चोर झाडाचा गाभारा तोडत असल्याचे त्यांनी प्रत्यक्ष पाहिले. तत्काळ इतरांना जागे केले; मात्र तोपर्यंत चोरट्यांनी मौल्यवान भाग पळवून नेला होता. पाठलाग करूनही चोरटे हाताशी लागले नाहीत.या प्रकरणी सुनील नवले यांनी बेलापूर पोलिस ठाण्यात तक्रार नोंदवली आहे. खुद्द पत्रकाराचेच चंदनाचे झाड चोरीला गेल्याने परिसरात संतापाची लाट उसळली आहे.स्थानिक ग्रामस्थांच्या मते, बेलापूर भागात काही चंदन चोरटे वास्तव्य करत असून हेच लोक बाहेरच्या टोळ्यांना माहिती देतात. चंदन चोरीचा तपास लावून दोषींवर कठोर कारवाई करावी, अशी मागणी नवले कुटुंबासह ग्रामस्थांनी पोलिसांकडे केली आहे.
