श्रीरामपूर-
पत्रकार व संपादक अॅड. बाळासाहेब आगे यांना जीवे मारण्याची धमकी देणाऱ्या आरोपी गणेश मुंढे याला मध्यप्रदेश मधील इटारसी येथून जेरबंद करण्यात एलसीबीच्या पथकाला यश आले आहे.
श्रीरामपुरात पकडलेल्या नशेच्या इंजेक्शन संदर्भात दाखल झालेल्या गुन्ह्याची न्यूज इंस्टाग्रामवर टाकली म्हणून सदर न्यूज डिलीट करण्यासाठी आगे यांना या गुन्ह्यातील फरार आरोपी गणेश मुंढे याने धमकी दिली होती.या प्रकरणी १८ ऑगस्ट २०२५ रोजी श्रीरामपूर शहर पोलिसात पत्रकार संरक्षण कायद्याअंतर्गत गुन्हा दाखल करण्यात आला होता.आगे यांना धमकी देणाऱ्या आरोपीला तातडीने अटक करावी या मागणीचे निवेदन श्रीरामपूर तसेच नगर जिल्ह्यातील सर्व पत्रकार संघटनांनी जिल्हा पोलीस प्रमुख सोमनाथ घार्गे, अप्पर अधीक्षक सोमनाथ वाघचौरे यांच्याकडे केली होती. त्यानंतर हा तपास डीवायएसपी जयदत्त भवर यांच्याकडे देण्यात आला होता. त्यानंतर आरोपीला पकडण्यासाठी एलसीबी चे प्रमुख किरण कबाडी यांचे नेतृत्वाखाली समीर अभंग, फुरकान शेख, रमीजराजा अत्तार, सुनील मालनकर, प्रशांत राठोड यांचे एक पथक तयार करण्यात आले होते. दोन दिवसापूर्वी या पथकाला गुप्त माहिती मिळाली की, आरोपी मुंढे हा मध्यप्रदेश मधील इटारसी येथे दडून बसला आहे. विशेष पथकाने मध्यप्रदेश मधील
इटारसी येथे जाऊन या आरोपीला तातडीने जेरबंद केले. सदर आरोपी अन्य दोन गुन्हयांसाठीही पोलिसांना हवा होता.पत्रकारीतेचे कर्तव्य बजावणाऱ्या आगे यांना धमकी देणारा आरोपी पोलिसांनी अखेर जेरबंद केल्याने जिल्हाभरातील सर्व पत्रकारांनी पोलीस अधीक्षक सोमनाथ घार्गे, अप्पर पोलीस अधीक्षक सोमनाथ वाघचौरे, डीवायएसपी जयदत्त भवर, एलसीबीचे पोनि. किरण कबाडी, श्रीरामपूर शहर पोलीस स्टेशनचे पोनि. नितीन देशमुख, पोलीस उपनिरीक्षक समाधान सोळंके यांच्यासह पोलिस कर्मचाऱ्यांना धन्यवाद दिले आहेत.
