श्रीरामपूर-
श्रीरामपूर तालुक्यातील जाफराबाद आणि जुने नायगाव शिवारात गोदावरी नदी पात्रातून बेकायदा वाळू उपसा करणाऱ्यांवर पोलिसांनी धडक कारवाई करत दोन हायवा, एक जेसीबी मशीन व सुमारे १२ ब्रास वाळूसह एकूण ७३ लाख २० हजारांचा मुद्देमाल जप्त केला आहे. श्रीरामपूर तालुका पोलिसांनी केलेल्या या कारवाईत ६ जणांवर गुन्हे दाखल करण्यात आले आहेत.
सोमवार (दि.१८) रोजी सायंकाळी जाफराबाद शिवारातील गोदावरी नदीपात्रात पोलिसांनी एक कारवाई केली.या प्रकरणी पोलिस हवालदार रामेश्वर ढोकणे यांच्या फिर्यादीवरून गुन्हा दाखल करण्यात आला आहे. घटनास्थळावरून ३० लाख ६० हजारांचे दोन विना नंबरचे ट्रक आणि ६ ब्रास वाळू जप्त करण्यात आली. या प्रकरणी बापू चिखले, योगेश घंगाळे, विशाल निकम व विजय कुंजीर (सर्व रा. वैजापूर) यांच्यावर गुन्हा दाखल झाला असून ते सर्व फरार झाल्याची माहिती पोलिसांनी दिली.दुसरी कारवाई गुरुवारी (ता. २१) दुपारी जुने नायगाव शिवारात करण्यात आली. उपविभागीय पोलिस अधिकारी कार्यालयाचे पोलिस हवालदार सुनील शिंदे यांच्या पथकाने जेसीबीच्या साहाय्याने हायवा डंपरमध्ये बेकायदा वाळू भरताना आरोपींना पकडले. या कारवाईत ४२ लाख ६० हजार रुपये किमतीचा हायवा डंपर, एक जेसीबी मशीन आणि ६ ब्रास वाळू जप्त करण्यात आली. याप्रकरणी आरोपी शुभम भाऊसाहेब पवार (रा. श्रीरामपूर) आणि सुरेश सुदाम आहेर (रा. सावळी विहीर) यांना ताब्यात घेऊन गुन्हा दाखल केला आहे.पुढील तपास श्रीरामपूर तालुका पोलिस ठाण्याचे प्रभारी निरीक्षक अरुण धनवडे यांच्या मार्गदर्शनाखाली सुरू आहे.
