श्रीरामपूर-
श्रीरामपूर तालुक्यातील पूर्व भागात सुरू असलेल्या एका इन्वेस्टमेंटच्या कार्यालयाची अप्पर पोलीस अधीक्षक सोमनाथ वाघचौरे यांच्या कार्यालयातील पथकाकडून झाडाझडती सुरु झाली आहे.उपविभागीय पोलीस अधिकारी श्रीरामपूर व अपर पोलीस अधीक्षक कार्यालयातील सर्व स्टाफ संयुक्तरित्या अजूनही या इन्व्हेस्टमेंट कंपनीच्या कागदपत्रांची झडती करून पुढील कारवाई करत आहे.दरम्यान या कारवाईने जादा पैशांच्या आमिषाने गुंतवणूक करणाऱ्या परिसरासह जिल्ह्याबाहेरील अनेक गुंतवणूकदारांचे धाबे आता दणाणले आहेत.अनेक पुढाऱ्यांचाही बेनामी पैसाही येथे गुंतवण्यात आलेला आहे.सदर व्यक्ती पंजाबला गेल्याची माहिती तपासात पुढे आली असली तरी कागदपत्रांतील मिळालेल्या महितीनुसार फसवणूक झालेल्यांचा आकडा कित्येक कोटींच्या घरात असल्याची शक्यता व्यक्त केली जात आहे.
पोलीस प्रशासनाकडून संपूर्ण झडतीचे व्हिडिओ शूटिंग करून रीतसर पंचनामा करण्यात आला आहे. काही महत्त्वाचे दस्तऐवजही पोलिसांनी ताब्यात घेतले आहेत. सदर कंपनीच्या कार्यालयाला पोलीस विभागाकडून पंचासमक्ष सील ठोकले आहे.
संबंधितांना रितसर समन्स बजावून परवानगी बाबतचे दस्तऐवजांची पडताळणी करून पुढील कायदेशीर प्रक्रिया पोलीस विभाग करणार आहे.गेल्या काही दिवसांपासून सदर इन्वेस्टमेंट कंपनी बाबत तोंडी स्वरूपात पोलीस अधिकाऱ्यांकंडे तक्रारी प्राप्त होत होत्या. पुढील संभाव्य फसवणुकीच्या प्रकारांना आळा म्हणून पोलीस अधिकाऱ्यांनी स्वतः होऊन सदरची कारवाई केलेली असून उपविभागीय पोलीस अधिकारी श्रीरामपूर व अपर पोलीस अधीक्षक कार्यालयातील सर्व स्टाफ अजूनही झडती कारवाई करत आहे.
