श्रीरामपूर-
संगमनेरचे शिवसेनेचे आमदार अमोल खताळ यांच्यावर सार्वजनिक कार्यक्रमात एका माथेफिरुने हल्ला केल्याची धक्कादायक घटना घडली आहे. या हल्लेखोराला आमदार खताळ यांच्या सुरक्षारक्षकांनी तत्काळ ताब्यात घेत जेरबंद केले असून पोलीसही घटनास्थळी दाखल झाले आहेत. दरम्यान या घटनेने संगमनेर तालुक्यासह जिल्हाभरात संतापाची भावना निर्माण झाली आहे. आमदारांवरील हल्ल्याच्या धक्कादायक घटनेने संगगमनेर तालुक्यात ऐन गणेशोत्सवाट तणाव निर्माण झाला असून पोलिसांनी कार्यकर्त्यांना शांततेचे आवाहन केले आहे.याबाबत सविस्तर माहिती अशी की, राजस्थान युवक मंडळाने आयोजित केलेल्या संगमनेर फेस्टिवलच्या उद्घाटन समारंभात सहभागी होण्यासाठी आमदार अमोल खताळ मालपाणी लॉन्स या ठिकाणी उपस्थित होते. कार्यक्रमानंतर बाहेर पडताना ते उपस्थित असलेल्या प्रेक्षकांशी हस्तांदोलन करीत असतानाच प्रेक्षकांमध्ये बसलेल्या एका तरुणाने त्यांच्या हातात हात देण्याच्या बहाण्याने त्यांच्यावर हल्ला केला.तात्काळ आ. खताळ यांच्या सुरक्षारक्षकाने हल्लेखोरावर झडप घातली व त्यास जेरबंद केले. हल्ल्याचह्या घटनेने तेथे उपस्थित असलेल्या मालपाणी उद्योग समूहाच्या सुरक्षारक्षकांनीही धाव घेत हल्लेखोर तरुणाला कार्यालयात नेऊन कोंडले.घडलेली घटना वाऱ्याच्या वेगाने शहरभर पसरली.
सदरच्या घटनेने संगमनेर तालुका व परिसरात तणाव निर्माण झाला आहे. या घटनेनंतर उपस्थितांमधील अनेकांसह ही घटना शहरात कळल्यानंतर काही वेळातच शेकडो तरुणांनी मालपाणी लॉन्सच्या दिशेने धाव घेतली. पोलिसांनी हल्लेखोराला पोलीस ठाण्यात आणले आहे. या घटनेने ऐन गणेशोत्सवात संगमनेरातील राजकारण तापण्याची शक्यता असून तालुक्यात मोठा तणाव निर्माण झाला आहे. या घटनेचे पडसाद उमटण्याची दाट शक्यता व्यक्त केली जात आहे. संगमनेर सारख्या सुसंस्कृत शहरात वारंवार घडणाऱ्या अशा घटनांनी संगमनेर शहराचे नाव बदनाम होत असल्याची चर्चा सुरू झाली आहे.
